Fógra Príobháideachais maidir le Cosaint Sonraí

Pearsana aonair a dhéanann iarratas chuig an mBanc Ceannais ar cheadú chun feidhm rialaithe réamhcheadaitheach (PCF) a fheidhmiú i soláthraí seirbhísí airgeadais, ceanglaítear orthu Ceistneoir Indibhidiúil a thíolacadh don Bhanc Ceannais. Chun an Ceistneoir Indibhidiúil a chur i gcrích, ní mór sonraí pearsanta a thíolacadh don Bhanc Ceannais, lena n-áirítear na sonraí seo a leanas:

• Ainm, seoladh, sonraí pearsanta agus uimhir an phas
• Sonraí maidir le taithí ghairmiúil agus cáilíochtaí oideachais
• Faisnéis a bhaineann le ciontuithe coiriúla agus le himeachtaí araíonachta
• Sonraí maidir le scairshealúchais agus leasanna gnó iarratasóirí
• Sonraí maidir le stiúrthóireachtaí agus poist shinsearacha eile na n-iarratasóirí.

Próiseálann an Banc Ceannais an fhaisnéis seo agus aon fhaisnéis eile a bhaineann le sealbhóirí ról PCF d’fhonn a chuid feidhmeanna oiriúnachta agus ionracais faoi Chuid 3 den Acht um Athchóiriú an Bhainc Ceannais 2010 a chomhlíonadh, agus go háirithe, chun measúnú a dhéanamh ar oiriúnacht an iarratasóra chun ról PCF a fheidhmiú. Mura gcuireann iarratasóir PCF an fhaisnéis riachtanach ar fáil, ní bheidh an Banc Ceannais in ann a iarratas nó a hiarratas a mheasúnú.

Coinneoidh an Banc Ceannais faisnéis a bhaineann le hoiriúnacht agus le hionracas go ceann tréimhse 30 bliain tar éis don phearsa aonair lena mbaineann ról PCF a fhágáil.

Tá an Banc Ceannais Eorpach (BCE) freagrach as measúnú a dhéanamh ar oiriúnacht agus ionracas na mbord bainistíochta in institiúidí suntasacha creidmheasa, agus ar oiriúnacht agus ionracas sealbhóirí príomhfheidhmeanna laistigh de na hinstitiúidí sin, agus ar oiriúnacht agus ionracas na mbord bainistíochta sna hinstitiúidí creidmheasa go léir a dhéanann iarratas ar údarú. Cuireann an Banc Ceannais na hiarratais sin ar aghaidh chuig an BCE lena measúnú i gcomhréir le Rialachán Uimh. 1024/2013 ón gComhairle (Rialachán SMA).

Próiseálann an Banc Ceannas sonraí pearsanta de chuid pearsana aonair amhail comhaltaí foirne, scairshealbhóirí agus custaiméirí soláthraithe seirbhísí airgeadais i dtaca le soláthraithe agus margaí seirbhísí airgeadais a rialáil. Próiseálaimid sonraí pearsanta den sórt sin ar chúiseanna éagsúla, lena n-áirítear soláthraithe rialáilte seirbhísí airgeadais a údarú agus maoirseacht leanúnach a dhéanamh orthu, margaí airgeadais a rialáil agus imscrúdú a dhéanamh ar sholáthraithe neamhúdaraithe seirbhísí airgeadais. 

Pearsana aonair amhail faighteoirí molta ar shealúchais cháilitheacha in eintitis údaraithe nó daoine a chomhallann freagrachtaí bainistíochta (PDMRanna) laistigh d’eisitheoir, tá oibleagáid orthu sonraí pearsanta áirithe a thabhairt don Bhanc Ceannais faoi reacht. Féadfaidh comhaltaí foirne i soláthraithe rialáilte seirbhísí airgeadais sonraí pearsanta teoranta a thabhairt don Bhanc Ceannais freisin i dtaca le tuairisceáin rialáilte a dhéanamh nó i dtaca le faisnéis eile thar ceann a bhfostóra e.g. d’fhonn doiciméid a uaslódáil chuig an gCóras Tuairiscithe ar Líne (ONR) de chuid an Bhainc Ceannais.

Féadfaidh an Banc Ceannais sonraí pearsanta a phróiseáil freisin i dtaca le sealbhóirí róil feidhme rialaithe (CF) chun críocha a bhaineann le maoirseacht a dhéanamh ar sholáthraithe rialáilte seirbhísí airgeadais ina bhfuil na sealbhóirí róil CF sin fostaithe.

Coinneoidh an Banc Ceannais na sonraí sin ar feadh cibé fad is gá chun na gcríoch sonrach maoirseachta ar ina leith a bailíodh iad. Is féidir linn faisnéis a sholáthar maidir leis an tréimhse choinneála do shonraí pearsanta ar leith, ar iarratas chuige sin.

De bhun Alt 30(3) de 4AMLD (arna leasú le 5AMLD & 6AMLD), lena gceanglaítear go ndéanfar úinéireacht thairbhiúil meán airgeadais áirithe (CFV) a thaifeadadh ar chlár lárnach i ngach Ballstát, próiseálann an Banc Ceannais sonraí pearsanta maidir le haon duine/daoine nádúrtha ar úinéirí tairbhiúla iad ar Ghléasanna Éireannacha um Chomhbhainistiú Sócmhainní (ICAVanna), ar Iontaobhais Aonaid, ar Chomhair Chreidmheasa, ar Chomhpháirtíochtaí Teoranta Infheistíochta nó ar Chomhchistí Conarthacha.

Is é cuspóir an Chláir um Úinéireacht Thairbhiúil stop a chur le Sciúradh Airgid agus Maoiniú Sceimhlitheoireachta agus a chinntiú go n-aithneofar iad siúd a fhéachann lena n-úinéireacht agus a rialú ar eintitis chorparáideacha nó dhlíthiúla a cheilt, trí bhíthin úinéirí/rialaitheoirí deiridh CFV a aithint, agus go mbeidh an fhaisnéis sin inrochtana go héasca ag na húdaráis um fhorfheidhmiú dlí, rialtóirí agus eintitis faoi oibleagáid.

Tá oibleagáid ar CFV faisnéis phearsanta agus faisnéis maidir le cineál agus méid an leasa thairbhiúil a shealbhaítear nó an rialaithe a fheidhmítear ag gach úinéir tairbhiúil a chur chuig an gClár.  Folaíonn faisnéis phearsanta an méid seo a leanas:

1. Céadainm agus sloinne
2. Dáta breithe
3. Seoladh cónaithe reatha lena n-áirítear tír chónaithe
4. Náisiúntacht

Stórálfar an fhaisnéis seo go daingean ar an gClár um Úinéireacht Thairbhiúil agus ní dhéanfar í a eisiúint ach amháin nuair a dhéanfar iarratas chuig an gClár um Úinéireacht Thairbhiúil ar fhaisnéis a bhaineann le húinéireacht thairbhiúil.

D’fhonn an fhaisnéis thuasluaite a fhíorú, agus chun na críche sin amháin, ceanglaítear ar CFV faoi Rialachán 21 de I.R. 110 de 2019 agus faoi Alt 52 agus Alt 63 den Acht um Chomhpháirtíochtaí Teoranta 2020 (Acht 2020) uimhir PSP a chur ar fáil (nó Uimhir Thagartha Bhanc Ceannais na hÉireann i gcás nach bhfuil PSP ar fáil) chun a éascú don Bhanc Ceannais Céadainm, Sloinne agus Dáta Breithe gach úinéara thairbhiúil a fhíorú.

D’fhonn an fhaisnéis seo a fhíorú, déantar uimhir PSP, Céadainm, Sloinne agus Dáta Breithe an úinéara thairbhiúil a sheiceáil in aghaidh uimhreacha PSP i mbunachar sonraí na Roinne Coimirce Sóisialaí. Chuige sin, déanfaidh an Banc Ceannais uimhir PSP, céadainm, sloinne agus dáta breithe an úinéara thairbhiúil a roinnt leis an Roinn Coimirce Sóisialaí trí mhodhanna leictreonacha slána.  Tá comhaontú comhroinnte sonraí déanta ag an mBanc Ceannais leis an Roinn Coimirce Sóisialaí d’fhonn an socrú seo a rialú agus chun faireachán a dhéanamh air.

I gcás nach mbeidh uimhir PSP Éireannach sannta don úinéir/do na húinéirí tairbhiúla ach go mbeidh uimhir thagartha Bhanc Ceannais na hÉireann faighte ag an duine/na daoine aonair roimhe sin, féadfar uimhir thagartha chomhréireach Bhanc Ceannais na hÉireann a chur ar fáil chun na críche seo.

I gcás úinéirí tairbhiúla nach mbeidh uimhir PSP, nó uimhir thagartha Bhanc Ceannais na hÉireann, sannta dóibh, ní mór Dearbhú maidir le Fíorú Céannachta a thabhairt don Bhanc Ceannais chun go mbeidh an Banc Ceannais in ann Uimhir Thagartha Bhanc Ceannais na hÉireann a thabhairt don úinéir tairbhiúil.

Ar an bhfaisnéis phearsanta a bhailítear mar chuid den phróiseas seo, áirítear an méid seo a leanas:

1. Céadainm agus Sloinne
2. Dáta Breithe
3. Náisiúntacht
4. Seoladh Cónaithe Reatha
5. Ríomhphost

D’fhonn an fhaisnéis seo a fhíorú, déantar uimhir thagartha Bhanc Ceannais na hÉireann, Céadainm, Sloinne agus Dáta Breithe an úinéara thairbhiúil a sheiceáil in aghaidh sonraí pearsanta eile arna mbailiú ag Banc Ceannais na hÉireann le linn dó a chuid feidhmeanna reachtúla a chomhlíonadh agus arna sonrú in áit eile sa Ráiteas Príobháideachais maidir le Sonraí.

I gcás ina mbeidh CFV faoi leachtú, ceanglófar go ndéanfar faisnéis phearsanta mar atá leagtha amach thuas i ndáil leis an leachtaitheoir ceaptha a thaifeadadh ar an gClár um Úinéireacht Thairbhiúil. Déanfar faisnéis a bhaineann leis an leachtaitheoir a choinneáil go ceann tréimhse 10 mbliana i ndiaidh an athraithe ar stádas údaraithe (i.e. díscaoilte), i gcomhréir le ceanglais Rialachán 21(4) I.R. Uimh. 110 de 2019, agus déanfar an fhaisnéis go léir a bhaineann le CFV a scriosadh as bunachar BOR i ndiaidh na tréimhse sin.

I Rialacháin 24 agus 25 de I.R. 100 de 2019 agus in Ailt 55, 56 agus 63 d’Acht 2020, foráiltear do dhá chineál rochtana ar an bhfáisnéis maidir le húinéireacht thairbhiúil ar an gClár um Úinéireacht Thairbhiúil - rochtain “neamhshrianta” agus rochtain “shrianta”. 

Sna leasuithe ar Rialachán 25 trí bhíthin IR Uimh. 46 de 2026, foráiltear do rochtain ar an bhfáisnéis maidir le húinéireacht thairbhiúil ar an gclár trí Rochtain Leasa Dhlisteanaigh a chuirtear ar fáil ar bhonn “srianta”. Níl feidhm ag Rochtain Leasa Dhlisteanaigh faoi láthair ach amháin le faisnéis maidir le húinéireacht thairbhiúil de chuid Iontaobhais Aonad, Gléasanna Éireannacha um Chomhbhainistiú Sócmhainní agus Comhair Chreidmheasa, ó tharla nach bhfuil aon bhonn dlíthiúil le rochtain den sórt sin ar fhaisnéis maidir le húinéireacht thairbhiúil de chuid Comhpháirtíochtaí Teoranta agus Comhchistí Conarthacha, lena mbaineann Acht 2020. Mar aon le rochtain a thabhairt ar fhaisnéis na n-úinéirí tairbhiúla reatha faoi rochtain Leasa Dhlisteanaigh, féadfaidh rochtain a bheith ag aicmí áirithe iarratasóirí leasa dhlisteanaigh ar fhaisnéis stairiúil i.e. Úinéirí Tairbhiúla reatha agus Úinéirí Tairbhiúla de chuid Iontaobhais Aonad, Gléasanna Éireannacha um Chomhbhainistiú Sócmhainní agus Comhair Chreidmheasa.  Baineann an dliteanas maidir le faisnéis stairiúil leis na haicmí sin d’iarratasóirí leasa dhlisteanaigh mar a shonraítear i Rialachán 25(3)(b)(i)(ii) agus (v) de SI 110 de 2019. I gcás na n-iarratasóirí leasa dhlisteanaigh eile go léir mar a shonraítear i Rialachán 25(3)(b)(iii), (iv) agus (vi-x), ní dhéanfar ach faisnéis maidir le húinéireacht thairbhiúil reatha a chur ar fáil. Chun críocha iarratas a bheidh bunaithe ar Leas Dlisteanach, beidh an fhaisnéis seo a leanas ag teastáil chun céannacht an iarratasóra a fhíorú:

Cóip inléite shoiléir de cheann amháin de na doiciméid seo thíos:

• Pas - an leathanach aitheantais (ainm, dáta breithe, grianghraf agus síniú) de phas/de phaschárta an iarratasóra; nó
• Cárta Ceadúnais Tiomána AE / ceadúnas tiomána idirnáisiúnta - an taobh aitheantais (grianghraf, ainm agus síniú) de chárta ceadúnais tiomána an iarratasóra.

Is gá go mbeidh an pas/ceadúnas tiomána bailí agus i bhfeidhm agus go mbeidh a dháta éagtha níos faide ná sé mhí sa todhchaí. Tar éis céannacht an iarratasóra a fhíorú, scriosfar an chóip den doiciméad aitheantais. Féadfaidh go n-iarrfaidh an Cláraitheoir doiciméid tacaíochta bhreise d’fhonn iarratas atá bunaithe ar Leas Dlisteanach a mheasúnú.

Maidir le gach cinneadh a dhéanfaidh an Cláraitheoir i ndáil le rochtain ar fhaisnéis ar an gClár Lárnach a cheadú nó a dhiúltú, coinneoidh an Banc Ceannais taifid go ceann tréimhse 3 bliana ó dháta cruthaithe an taifid i leith iarratais rathúla ar dheimhniú, agus go ceann tréimhse 1 bhliain amháin i leith iarratais neamhrathúla ar dheimhniú (i.e. diúltuithe).

Sainmhínítear duine ainmnithe in Alt 25 den Acht um Cheartas Coiriúil (Sciúradh Airgid agus Maoiniú Sceimhlitheoireachta) 2010, arna leasú leis an  Acht um Cheartas Coiriúil (Sciúradh Airgid agus Maoiniú Sceimhlitheoireachta) (Leasú) 2018.

Áirítear institiúidí airgeadais, cuntasóirí, iniúchóirí, comhairleoirí cánach, gairmithe dlíthiúla, agus déileálaithe earraí costasacha (amhail tithe, carranna, seodra, etc.)  Ceanglaítear ar dhaoine ainmnithe seiceálacha ar fhaisnéis chúlra a dhéanamh ar dhaoine aonair nó ar eintitis a ndéanfaidh siad idirbheart airgeadais leo nó a mbeidh caidreamh gnó acu leo faoin reachtaíocht Frithsciúrtha Airgid. Faoi I.R. 110 de 2019 agus Acht 2020, ceanglaítear, inter alia, go dtabharfaidh CFV faisnéis áirithe maidir le húinéireacht thairbhiúil don duine ainmnithe nuair a dhéanfaidh an duine ainmnithe idirbheart ócáideach le CFV, agus go bhféadfaidh an duine ainmnithe rochtain a fháil ar fhaisnéis maidir le húinéireacht thairbhiúil ar an gClár um Úinéireacht Thairbhiúil. 

Tá an fhaisnéis sin ‘srianta’ nó teoranta don mhéid seo a leanas:

• Ainm CFV
• Úinéir Tairbhiúil/Úinéirí Tairbhiúla - Ainm; Náisiúntacht; Tír Chónaithe; Mí agus Bliain Bhreithe; Cineál na hÚinéireachta Tairbhiúla a shealbhaítear

I gcás gur mionaoiseach an t-úinéir tairbhiúil (i.e. faoi bhun 18 mbliana déag d’aois), eisiatar a gcuid sonraí de ghnáth ó rochtain ag daoine ainmnithe agus ag daoine aonair ar féidir leo leas dlisteanach a léiriú. I gcomhréir le Rialachán 25(5) de I.R. 110 de 2019, féadfar rochtain a sholáthar i gcás ina dtabharfar achoimre don Chláraitheoir ar na forais ar a gcreideann an t-iarrthóir go bhfuil an fhaisnéis á nochtadh dó nó di.  Féadfaidh an Cláraitheoir a chinneadh cibé acu an nochtfaidh nó nach nochtfaidh sé nó sí an fhaisnéis bunaithe ar na forais sin. Ina theannta sin, foráiltear le Rialachán 25(5)(a), go gcloífear freisin, anuas ar fhaisnéis maidir le húinéireacht thairbhiúil de chuid mionaoiseach, le heisceachtaí i gcás ina mbeidh úinéir tairbhiúil de chuid eintiteas ábhartha ar easpa cumais de réir bhrí an Achta um Chinnteoireacht Chuidithe (Cumas) 2015.  Ceanglóidh iarratais den sórt sin ar an iarrthóir na forais ar a bhfuil an fhaisnéis á lorg a sholáthar i scríbhinn don Chláraitheoir.  Forchoimeádfaidh an Cláraitheoir an ceart chun diúltú d’iarratais den sórt sin, agus i gcás ina ndiúltófar amhlaidh, forchoimeádfaidh an t-iarrthóir an ceart chun achomharc a dhéanamh in aghaidh cinnidh den sórt sin.

Tá an fhaisnéis go léir (faisnéis ‘neamhshrianta’) ar an gClár um Úinéireacht Thairbhiúil ar fáil d’údaráis inniúla ar leith, lena n-áirítear faisnéis a bhaineann le mionaoisigh. Ar na húdaráis inniúla, áirítear na cinn seo a leanas:

• an Garda Síochána
• an tAonad um Fhaisnéis Airgeadais
• na Coimisinéirí Ioncaim
• an Biúró um Shócmhainní Coiriúla
• an Clár Lárnach um Úinéireacht Thairbhiúil ar Iontaobhais
• an Roinn Gnóthaí Eachtracha agus Trádála
• an Roinn Fiontar, Turasóireachta agus Fostaíochta
• Banc Ceannais na hÉireann
• AMLA
• Oifig an Ionchúisitheora Phoiblí Eorpaigh (EPPO)
• an Oifig Eorpach Fhrith-Chalaoise (OLAF)
• Europol
• Eurojust
• an Roinn Dlí agus Cirt agus Comhionannais
• an tÚdarás Rialála Seirbhísí Maoine (PSRA)
• Dlí-Chumann na hÉireann
• Ardchomhairle Bharra na hÉireann
• Comhlacht cuntasaíochta ainmnithe (de réir bhrí Chuid 4 den Acht um Cheartas Coiriúil (Sciúradh Airgid agus Maoiniú don Sceimhlitheoireacht) 2010), agus
• cigire arna cheapadh ag an Stiúrthóir ar Fhorfheidhmiú Corparáideach faoi alt 764(1) d’Acht na gCuideachtaí 2014.

Féadfaidh údaráis inniúla an fhaisnéis ar an gClár um Úinéireacht Thairbhiúil a nochtadh le haon údarás inniúil comhfhreagrach i mBallstát eile nuair a iarrfaidh an t-údarás inniúil comhfhreagrach orthu déanamh amhlaidh.

Ní dhéantar uimhreacha PSP nó uimhreacha tagartha Bhanc Ceannais na hÉireann a thabhairt i gcás ar bith do dhaoine aonair ar féidir leo leas dlisteanach a léiriú, nó do dhaoine ainmnithe nó d’údaráis inniúla. Is chun faisnéis a fhíorú, agus chun na críche sin amháin, a bhailítear iad. A luaithe a bheidh céannacht an úineara thairbhiúil fíoraithe, coinneofar UPSP go slán i bhformáid haiseáilte do-aisiompaithe agus déanfar UPSP bhunaidh arna cur isteach a scriosadh laistigh de 24 uair an chloig tar éis í a fháil.

Ina theannta sin, cuireann CFV sonraí pearsanta teoranta chuig an gClár um Úinéireacht Thairbhiúil maidir leis an duine a chuirfidh faisnéis chuig an gClár um Úinéireacht Thairbhiúil thar ceann CFV.

Tá oibleagáid ar an mBanc Ceannais faoi Airteagal 30(4) 4AMLD (arna leasú le 5AMLD & 6AMLD) “a chinntiú go bhfuil an fhaisnéis atá á coinneáil ar an gclár lárnach leordhóthanach, cruinn agus reatha”. Déanfaidh an Banc Ceannais faisnéis atá á coinneáil maidir le CFV a scriosadh ón gClár um Úinéireacht Thairbhiúil nuair a bheidh deich mbliana caite ó dháta díscaoilte an CFV sin má tharlaíonn an díscaoileadh sin.

Coinneoidh an Banc Ceannais na taifid go léir a bhaineann le faisnéis a fhaightear trí dhearbhú maidir le fíorú céannachta, coinneoidh an Banc Ceannais iad go ceann tréimhse 15 bliana ón tráth a scoir an duine aonair de bheith ina úinéir nó ina húinéir tairbhiúil ar CFV(anna).

Lean ort ag léamh chun eolas a fháil maidir le do chearta um shonraí pearsanta.

Féadfaidh an Banc Ceannais imscrúdú a dhéanamh ar sholáthraithe rialáilte seirbhísí airgeadais nó ar phearsana aonair laistigh de sholáthraithe rialáilte seirbhísí airgeadais, i gcás ina mbeidh imní ann gur sáraíodh dlí seirbhísí airgeadais nó go bhfuil dlí seirbhísí airgeadais á shárú. Is é cuspóir imscrúduithe den sórt sin bailiú faisnéise leordhóthanaí a éascú chun a chumasú don Bhanc Ceannais a chinneadh cibé acu ar sáraíodh dlí seirbhísí airgeadais agus cibé acu an ceart smachtbhannaí a fhorchur.

Le linn phróiseas an imscrúdaithe forfheidhmiúcháin, féadfaidh an Banc Ceannais sonraí pearsanta a bhailiú faoi chumhachtaí reachtúla lena n-áirítear na cinn seo faoin Acht um Athchóiriú an Bhainc Ceannais 2010, faoi Acht an Bhainc Ceannais (Maoirsiú agus Forfheidhmiú) 2013, faoi chórais measúnóra nó faoi reachtaíocht a bhaineann le margaí urrús (e.g. reachtaíocht um dhrochúsáid margaidh). Féadfaidh go gcuimseoidh na sonraí sin, sonraí pearsanta de chuid pearsana aonair nach bhfuil faoi réir an imscrúdaithe. Coinneoidh an Banc Ceannais an fhaisnéis go léir a gheofar i dtaca le himscrúdú go ceann tréimhse 20 bliain tar éis don chás lena mbaineann a bheith tugtha chun críche. Aon fhaisnéis a bhaileofar chun críocha imscrúduithe ar dhrochúsáid margaidh, coinneofar í go gceann tréimhse uasta cúig bliana tar éis don chás a bheith tugtha chun críche.

Féadfaidh daoine den phobal nó pearsana aonair eile ceisteanna a chur faoi bhráid an Bhainc Ceannais nó aiseolas a thabhairt don Bhanc Ceannais. Féadfaidh an Banc Ceannais na sonraí pearsanta arna gcur ar fáil ag pearsana aonair a úsáid chun freagraí a thabhairt ar a gcuid ceisteanna agus, i gcás inar iomchuí, chun aon saincheisteanna a ardófar a imscrúdú. Chun saincheisteanna den sórt sin a imscrúdú, féadfaidh gur gá sonraí pearsanta a nochtadh do thríú páirtithe amhail comhlacht reachtúil eile nó soláthraí rialáilte seirbhísí airgeadais. Coinneoidh an Banc Ceannais na sonraí sin ar feadh cibé fad is gá chun críocha na saincheisteanna a imscrúdú. Féadfar faisnéis a bhaineann leis an tréimhse choinneála do shonraí pearsanta ar leith a sholáthar, ar iarratas chuige sin. Féadfaimid úsáid a bhaint as aon aiseolas a thabharfaidh daoine den phobal dúinn maidir lenár saoráidí chun eispéireas úsáideoirí a fheabhsú agus chun na saoráidí sin a fheabhsú (e.g. an t-ionad cuairteoirí).

Ina theannta sin, bailíonn agus próiseálann an Banc Ceannais sonraí pearsanta arna gcur ar fáil ag daoine den phobal i dtaca le malartú nótaí bainc agus monaí dámáistithe euro, nó malartú nótaí puint nó monaí Éireannacha, d’fhonn measúnú a dhéanamh ar an iarratas ábhartha agus aisíocaíocht a thabhairt do na daoine sin. Go hiondúil, coinnítear iarratais ar mhalartú nótaí bainc nó monaí go ceann tréimhse bliana ach féadfar iad a choinneáil go ceann sé bliana breise i gcás ina dtaifeadtar sonraí go mícheart nó i gcás mainneachtain socraíocht íocaíochta a dhéanamh. Ina theannta sin, féadfaidh an Banc Ceannais sonraí maidir leis na hiarratais sin, lena n-áirítear cóipeanna de chéannacht a gheofar, a chur ar aghaidh chuig údaráis eile amhail An Garda Síochána nó na Coimisinéirí Ioncaim.

D’fhonn a chuid feidhmeanna reachtúla a chomhlíonadh, féadfaidh an Banc Ceannais úsáid a bhaint as aon fhaisnéis a gheobhaidh sé, lena n-áirítear sonraí pearsanta, ó dhuine a dhéanfaidh nochtadh cosanta (i.e. sceithirí). Tá oibleagáid dhlíthiúil ar an mBanc Ceannais céannacht an duine a dhéanfaidh nochtadh cosanta a chosaint agus gan aon fhaisnéis a nochtadh lena bhféadfar an duine sin a aithint, faoi réir eisceachtaí áirithe. Coinneoidh an Banc Ceannais faisnéis arna cur ar fáil ag sceithirí go ceann tréimhse 30 bliain tar éis d’aon chás gaolmhar a bheith tugtha chun críche.

Chun tuilleadh sonraí a fháil maidir leis an gcaoi ina láimhseálann an Banc Ceannais faisnéis arna cur ar fáil ag sceithirí, féach Protected Disclosures including Whistleblowing and Infringement Reports.

Earcaíocht

Bailíonn an Banc Ceannais sonraí pearsanta ó iarrthóirí chun críocha earcaíochta. Ar an bhfaisnéis a bhaileoidh agus a choinneoidh an Banc Ceannais maidir le hiarrthóirí, áirítear an méid seo a leanas:

• Ainm, seoladh, uimhir ghutháin agus seoladh ríomhphoist
• Sonraí maidir le cáilíochtaí, scileanna, taithí agus stair fostaíochta
• Sonraí maidir le stádas inimirce
• Sonraí maidir le haon chiontuithe coiriúla iarbhír nó maidir le haon chiontuithe coiriúla atá ar feitheamh in Éirinn nó in aon dlínse eile
• Aon fhaisnéis bhreise a bheidh i CV iarrthóra amhail faisnéis a bhaineann le moltóirí, nó aon fhaisnéis a nochtar le linn agallaimh nó a thugtar don Bhanc Ceannais ar bhealach eile le linn an phróisis earcaíochta.

Ní mór don Bhanc Ceannais sonraí a phróiseáil chun cinneadh a dhéanamh i dtaobh conradh fostaíochta a thabhairt d’iarrthóir ar leith agus féadfaidh sé sonraí áirithe a phróiseáil freisin chun a áirithiú go bhfuil a chuid oibleadgáidí dlíthiúla á gcomhlíonadh aige. Tá leas dlisteanach ag an mBanc Ceannais sonraí pearsanta a phróiseáil le linn an phróisis earcaíochta agus taifid ar an bpróiseas a choinneáil d’fhonn an próiseas earcaíochta a bhainistiú, oiriúnacht iarrthóra a mheasúnú agus a dheimhniú agus chun cinneadh a ghlacadh i dtaobh ról ar leith a thabhairt d’iarrthóir ar leith. Féadfaidh go mbeidh ar an mBanc Ceannais sonraí iarrthóirí a phróiseáil chun freagairt d’éilimh dhlíthiúla agus chun iad a chosaint.

I gcás poist bainistíochta áirithe, féadfaidh faisnéis an iarrthóra a thabhairt do sholáthraí seirbhíse tríú páirtí chun go bhféadfar oiriúnacht an iarrthóra don ról a mheasúnú. I ngach cás eile, ní roinnfidh an Banc Ceannais sonraí iarrthóra le tríú páirtithe ach amháin i gcás ina n-éireoidh lena iarratas nó lena hiarratas ar fhostaíocht agus ina ndéanfar tairiscint fostaíochta dó nó di. A luaithe a bheidh tairiscint fostaíochta déanta (agus a luaithe a ghlacfar léi), tabharfar sonraí pearsanta an iarrthóra sin don Gharda Síochána chun go ndéanfar grinnfhiosrú orthu agus féadfaidh an Banc Ceannais teagmháil a dhéanamh le fostóirí roimhe sin a bheidh ainmnithe ag an iarrthóir sin mar mholtóirí d’fhonn teistiméireachtaí fostaíochta a fháil. Ceanglófar ar an iarrthóir faisnéis liachta a thabhairt do sholáthraí sláinte ceirde an Bhainc Ceannais chun críocha cumas an iarrthóra dul i mbun oibre a mheasúnú.

Mura n-éireoidh le hiarratas iarrthóra, féadfaidh an Banc Ceannais a shonraí pearsanta nó a sonraí pearsanta a choinneáil go ceann tréimhse 12 mhí.

Pearsana aonair a mbeidh fáil acu ar limistéir neamhphoiblí laistigh d’fhoirgnimh an Bhainc Ceannais, ceanglófar orthu a n-ainmneacha a thabhairt agus aitheantas fótagrafach a thaispeáint don lucht slándála ar an láthair chun go bhféadfaí a gcéannacht a fhíorú. Ní choinneoidh an Banc Ceannais cóip d’aitheantas fótagrafach cuairteoirí.

Tá córais TCI i bhfeidhm ag an mBanc Ceannais ina chuid áitreabh ar mhaithe le slándáil an phobail agus slándáil comhaltaí foirne, ar mhaithe le coiriúlacht a chosc agus a bhrath agus chun prótacail chaighdeánacha gnó agus árachais a chomhlíonadh. Freagraíonn na bearta méadaithe físfhaireachais atá i bhfeidhm inár gcuid oibríochtaí a bhaineann le hairgeadra do na rioscaí gaolmhara a bhaineann le hoibríochtaí priontála san áitreabh. Tá ceamaraí TCI suite ag pointí rochtana, in ionaid fáiltithe, i láithreacha os comhair doirse ardaitheoirí ar gach urlár, sna carrchlóis, i láithreacha comhroinnte agus ag na teorainneacha seachtracha in Áth an Ghainimh. Fógraítear na limistéir ina bhfuil trealamh TCI in úsáid trí bhíthin comharthaí. Ní dhéanfaidh an Banc Ceannais íomhánna TCI a nochtadh do dhaoine eile seachas do dhaoine a bhfuil sé i gceist acu na híomhánna a úsáid chun na gcríoch a luaitear thuas.

Aon íomhánna a ghabhtar le TCI, coimeádfar iad go ceann tréimhse íosta 30 lá go hiondúil agus féadfar iad a choinneáil go ceann tréimhse sé mhí ag brath ar leibhéal na gníomhaíochta ar cheamaraí ar leith. Féadfar gur gá íomhánna a choinneáil go ceann tréimhse níos faide, áfach, mar shampla d’fhonn coir a imscrúdú.

Féadfaidh an Banc Ceannais sonraí pearsanta arna dtarchur ag forthairgeoirí a phróiseáil d’fhonn nósanna imeachta soláthair um dhámhachtain a bhainistiú agus cinneadh a dhéanamh i dtaobh conradh a dhéanamh le forthairgeoir ar leith. Sonraí pearsanta a bhaileofar chun na críche seo, féadfaidh go mbainfidh siad leis an bhforthairgeoir, lena fhoireann nó lena fhochonraitheoirí. Tar éis an gnáthamh soláthair a thabhairt chun críche agus tar éis don Bhanc Ceannais conradh a dhéanamh le soláthraí roghnaithe/soláthraithe roghnaithe, féadfaidh an Banc Ceannais sonraí pearsanta áirithe a phróiseáil d’fhonn a chuid oibleagáidí faoin gconradh sin, amhail íocaíocht a dhéanamh, a chomhlíonadh. Coinneoimid comhaid a bhaineann le gnáthaimh soláthair go ceann tréimhse na bliana reatha móide sé bliana.

Gach uair a úsáideann pearsa aonair suíomh gréasáin an Bhainc Ceannais, bailítear fianáin go huathoibríoch - tá cóip dár bhfógra maidir le fianáin le fáil ag deireadh an fhógra seo.

Baineann an Banc Ceannais úsáid as soláthraithe tríú páirtí chun faireachán a dhéanamh ar na meáin shóisialta agus ar ardáin ar líne atá fáil go poiblí. Leis an bhfaireachán seo, aithnítear gearáin, ceisteanna agus ábhair imní arna gcur in iúl ag daoine den phobal i ndáil le táirgí agus seirbhísí airgeadais agus baintear úsáid as an bhfaireachán sin mar sin chun eolas a thabhairt don Bhanc Ceannais agus chun tacú leis i gcomhlíonadh a chuid feidhmeanna reachtúla. Mar chuid den fhaireachán sin, féadfaidh an Banc Ceannais sonraí pearsanta a fháil ó na soláthraithe tríú páirtí, ar sonraí iad a bheidh nochta ag duine den phobal i gcomhfhreagras poiblí le soláthraithe rialáilte seirbhísí airgeadais nó le heintitis eile. Ní choinneoidh an Banc Ceannais sonraí pearsanta ach amháin i gcás inar gá déanamh amhlaidh chun sonraí postála poiblí a imscrúdú.

Tá an ceart agat cóip de na sonraí pearsanta atá ar seilbh ag an mBanc Ceannais fút a fháil mar aon le faisnéis faoin gcaoi ina n-úsáidtear iad.

Infheidhmeacht

Tá an ceart seo infheidhme gach tráth má bhíonn do chuid sonraí pearsanta ar seilbh ag an mBanc Ceannais.

Tá an ceart agat a iarraidh ar an mBanc Ceannais aon sonraí pearsanta a bheidh ar seilbh aige fút a cheartú i gcás ina mbeidh siad mícheart nó neamhiomlán.

Infheidhmeacht

Tá an ceart seo infheidhme gach tráth a bhíonn do chuid sonraí pearsanta ar seilbh ag an mBanc Ceannais.

Leis an gceart seo, tá tú i dteideal a iarraidh go ndéanfaí do chuid sonraí pearsanta a léirscriosadh ó chórais agus ó thaifid an Bhainc Ceannais. Ar a shon sin, ní bheidh an ceart seo infheidhme ach amháin in imthosca áirithe (e.g. i gcás nach mbeidh na sonraí pearsanta ag teastáil ón mBanc Ceannais a thuilleadh chun na críche ar ina leith a bailíodh iad nó i gcas ina mbeidh do thoiliú le do chuid sonraí pearsanta a úsáid tarraingthe siar agat).

Infheidhmeacht

Ní bheidh an ceart seo infheidhme i gcás ina mbeidh na sonraí pearsanta ag teastáil chun oibleagáid dhlíthiúil a chomhlíonadh nó chun cúram a chomhlíonadh ar mhaithe le leas an phobail nó chun údarás oifigiúil a fheidhmiú. Dá bhrí sin, ní bheidh an ceart seo infheidhme maidir le formhór na sonraí pearsanta a bheidh ar seilbh ag an mBanc Ceannais i gcomhlíonadh a chuid feidhmeanna reachtúla. 

Leis an gceart seo, tá tú i dteideal a iarraidh go ndéanfaí próiseáil do chuid sonraí pearsanta ag an mBanc Ceannais a shrianadh. I gcás ina bhfeidhmeofar an ceart seo, ceadófar don Bhanc Ceannais do chuid sonraí pearsanta a stóráil ach beidh cosc ar úsáid eile a bhaint as na sonraí sin ach amháin in imthosca teoranta.

Infheidhmeacht

Is féidir leat an ceart seo a fheidhmiú sna cásanna seo a leanas:

• Go gcuirfidh tú in aghaidh chruinneas na sonraí pearsanta atá ar seilbh fút agus go bhfíoróidh an Banc Ceannais cruinneas na sonraí

• Gur próiseáladh na sonraí pearsanta go mídhleathach agus go gcuirfidh tú in aghaidh a léirscriosta agus go n-iarrfaidh tú srianadh ina áit
• Nach mbeidh na sonraí pearsanta ag teastáil ón mBanc Ceannais a thuilleadh ach go mbeidh na sonraí ag teastáil uait i dtaca le héileamh dlíthiúil
• Gur chuir tú in aghaidh na próiseála agus go mbeidh cinneadh á ghlacadh ag an mBanc Ceannais i dtaobh cibé acu an sáraíonn a fhorais dhlisteanacha do chearta agus leasa.

Leis an gceart seo, is féidir leat do chuid sonraí pearsanta a fháil i bhformáid lena n-éascófar duit na sonraí pearsanta sin a aistriú chuig eagraíocht eile i gcás ina mbeidh do chuid sonraí pearsanta á bpróiseáil ag an mBanc Ceannais ar bhonn toiliú nó mar chomhall ar chonradh agus má phróiseáltar na sonraí trí mhodhanna uathoibrithe.  Féadfaidh go mbeidh an ceart agat go n-aistreoimid do chuid sonraí pearsanta go díreach chuig an eagraíocht eile, más indéanta sin go teicniúil.

Infheidhmeacht

Ní bheidh an ceart seo infheidhme i gcás ina mbeidh na sonraí pearsanta ag teastáil chun oibleagáid dhlíthiúil a chomhlíonadh nó chun cúram a chomhlíonadh ar mhaithe le leas an phobail nó chun údarás oifigiúil a fheidhmiú. Dá bhrí sin, ní bheidh an ceart seo infheidhme maidir le formhór na sonraí pearsanta a bheidh ar seilbh ag an mBanc Ceannais i gcomhlíonadh a chuid feidhmeanna reachtúla.

Beidh an ceart agat agóid a dhéanamh in aghaidh phróiseáil do chuid sonraí pearsanta ag an mBanc Ceannais in imthosca áirithe. Ar a shon sin, féadfaidh an Banc Ceannais leanúint de do chuid sonraí pearsanta a úsáid, d’ainneoin d’agóide, i gcás ina mbeidh forais láidre dhlisteanacha ann déanamh amhlaidh nó i gcás inar gá dúinn do chuid sonraí pearsanta a úsáid i dtaca le haon éilimh dhlíthiúla.

Infheidhmeacht

Beidh feidhm ag an gceart seo i gcás ina bpróiseálfaidh an Banc Ceannais do chuid sonraí pearsanta chun cúram a chomhall ar mhaithe le leas an phobail nó chun údarás oifigiúil a fheidhmiú nó de bhun a leasanna dlisteanacha.

Tá an ceart agat gan bheith faoi réir cinnidh a bheidh bunaithe ar phróiseáil uathoibrithe amháin (gan aon bhaint a bheith ag duine daonna leis) i gcás ina mbeidh éifeacht dhlíthiúil ag an gcinneadh sin nó i gcás ina ndéanfaidh sé difear suntasach duit.

Infheidhmeacht

Ó tharla nach nglacann an Banc Ceannais aon chinntí uathoibrithe faoi láthair, níl an ceart seo infheidhme.

Tá an ceart agat do thoiliú le próiseáil do shonraí pearsanta ag an mBanc Ceannais a tharraingt siar tráth ar bith. Ní dhéanfaidh sé seo difear do dhlíthiúlacht ár bpróiseála sula ndéanfar an toiliú a tharraingt siar.

Infheidhmeacht

Ní bheidh feidhm ag an gceart seo ach amháin i gcás inarb ionann an toiliú sin agus an t-aon bhunús dlí do phróiseáil do chuid sonraí pearsanta.

Tá an ceart agat gearán a dhéanamh leis an gCoimisinéir um Chosaint Sonraí má mheasann tú nár phróiseáil an Banc Ceannais do chuid sonraí pearsanta i gcomhréir leis an reachtaíocht um chosaint sonraí.

Infheidhmeacht

Beidh feidhm ag an gceart seo tráth ar bith.