Bonn profa airgid nua €15 a sheoladh chun comóradh a dhéanamh ar shaol agus ar shaothar Sir Charles Algernon Parsons

• Sheol an Banc Ceannais bonn airgid speisialta d’fhonn comóradh a dhéanamh ar shaol agus ar shaothar Sir Charles Algernon Parsons a cheap an tuirbín gaile.
• Ní chruthófar ach 6,000 bonn airgid agus beidh siad le ceannach ar €60 an ceann.
• Is féidir gach boinn airgid le haghaidh bailitheoirí agus gach tacar bonn a cheannach ar líne ar www.collectorcoins.ie

Sheol an Banc Ceannais líon teoranta bonn airgid speisialta €15 d’fhonn comóradh a dhéanamh ar shaol agus ar shaothar Sir Charles Algernon Parsons (1854-1931) a cheap an tuirbín gaile. Is féidir an bonn comórtha a cheannach anois ar an suíomh idirlín nua-sheolta www.collectorcoins.ie.

Ní chruthófar ach 6,000 bonn airgid comórtha Charles Algernon Parsons agus beidh siad le ceannach ar €60. Is é seo an tríú bonn airgid i Sraith Eolaíochta agus Aireagán an Bhainc Ceannais, agus is féidir iad go léir a cheannach ar líne, mar aon le boinn airgid chomórtha eile agus tacar bonn do bhailitheoirí.

Dul chun cinn ollmhór san innealtóireacht leictreach agus i nginiúint cumhachta leictrí ba ea an t-inneall tuirbín gaile a cheap Parson. D’athraigh tuirbíní gaile Parson iompar ar muir agus cogaíocht ar muir ó bhonn, agus é ag cur le luas agus éifeachtúlacht na n-árthaí mara.

Tá portráid an innealtóra mar aon le leagan luath an innill tuirbín gaile laistigh de scríbhinn agus samhail na lann tuirbín ar an mbonn profa airgid. Ba í Antonella Napolione a dhear an bonn chun comóradh a dhéanamh ar éachtaí Sir Charles Algernon Parsons agus bhuail BH Mayer Mint as airgead steirling .925 é.

D’fhás Sir Charles Parsons aníos i gCaisleán Bhiorra i gCo. Uíbh Fhailí, áit a meallann Ionad Eolaíochta agus Garraíodóireachta Chaisleán Bhiorra daoine ó ar fud an domhain a bhfuil spéis acu san eolaíocht. Thóg a athair siúd, an Tríú hIarla, an Teileascóp Mór a bhfuil cliú agus cáil air, agus ba ghrianghrafadóir ceannródaíoch í a mháthair. 


Nótaí

• Tá eolas breise ar Sir Charles Parsons agus ar a shaothar, le fáil in Ionad Eolaíochta Bhiorra ag Gairdíní Chaisleán Bhiorra Birr Castle, mar a bhfuil Coláiste na Tríonóide, Baile Átha Cliath ag tógáil teileascóp raidió ceannródaíoch faoi láthair. Tá cónaí ar theaghlach Parsons, an Tiarna agus an Bhantiarna Rosse, ar dhiméin Chaisleán Bhiorra i gcónaí.

Bonn profa

Is boinn inbhailithe iad boinn phrofa agus ní bheidh siad i gcúrsaíocht ghinearálta. Buailtear iad agus úsáid á baint as díslí agus boinn bhána sainsnasta ionas go mbeadh bailchríoch ar aon dul le scáthán orthu. Buailtear na boinn airgid faoi dhó ar a laghad i rith an phróisis bhuailte. Láimhseáiltear gach ceann díobh de láimh agus stóráiltear faoi chosaint iad ionas nach mbeadh aon smál orthu. Ní hionann é sin agus boinn airgid le haghaidh gnáthchúrsaíochta a bhuailtear uair amháin i rith an phróisis bhuailte agus a láimhseáiltear i mbulc. Baineann caighdeán inbhailithe le boinn airgid phrofa a mbíonn cuma ghlioscarnach, mhaisithe agus dhea-bhuailte orthu.

Eolas faoi collectorcoins.ie

• Is féidir le custaiméir reatha agus ionchais brabhsáil leo ar www.collectorcoins.ie mar a bhfuil eolas ar gach bonn le fáil.
• Beidh custaiméirí rialta in ann orduithe agus stair ordúcháin a sheiceáil agus is féidir le custaiméirí leas a bhaint as mianliostaí agus as ciseáin shábháilte agus iad ag siopadóireacht.