Cuimhní Cinn T.K. Whitaker Foilsithe ag an mBanc Ceannais

Tá cuimhní cinn an Iar-Ghobharnóra T.K. Whitaker curtha ar fáil go digiteach ag Banc Ceannais na hÉireann den chéad uair.

Cé go raibh na cuimhní cinn ar fáil lena léamh go pearsanta i gcartlann Bhanc Ceannais na hÉireann, tá siad ar fáil anois ar líne ar www.centralbank.ie, rud a chuireann ar chumas lucht léitheoireachta níos leithne teacht ar an gcáipéis thábhachtach stairiúil seo.

Le foilsiú Cuimhní Cinn T.K. Whitaker: An Banc Ceannais agus an Rialtas, 1969–1976, déantar comóradh ar 110 bliain ó rugadh T.K. Whitaker agus 50 bliain ó chríochnaigh sé a théarma mar Ghobharnóir.

Tugtar cuntas pearsanta sa leabhar cuimhní cinn ar thréimhse mhúnlaitheach i stair eacnamaíoch na hÉireann agus ar an ngaol idir beartas rialtais agus baincéireacht cheannais.

Tagann an foilseachán amach i gcomhthráth le Léacht Whitaker 2026 freisin, a thug an tIar-Ghobharnóir Patrick Honohan, a bhí ina Ghobharnóir ón mbliain 2009 go 2015. Bunaíodh an tsraith léachtaí chun ómós a thabhairt d’oidhreacht Whitaker, agus is pearsa iomráiteach i réimse na heacnamaíochta a thugann an léacht. I measc na gcainteoirí a thug an léacht roimhe seo tá Mark Carney, Gita Gopinath agus Agustín Carstens.

Maidir leis an bhfoilseachán, dúirt an Gobharnóir Gabriel Makhlouf: “Tá ríméid orm go bhfuil na cuimhní cinn seo á gcur ar fáil againn do lucht léitheoireachta níos leithne.” “Tríd an méid sin a dhéanamh, táimid ag cuidiú le tréimhse thábhachtach de stair Bhanc Ceannais na hÉireann féin agus den scéal níos leithne maidir le ceapadh beartais eacnamaíoch in Éirinn a chaomhnú.” Is féidir le léitheoirí comhaimseartha féachaint go díreach ar léargais Whitaker faoi na freagrachtaí a bhaineann le baincéireacht cheannais, faoi na brúnna a bhaineann le hairgeadas poiblí, agus faoi na castachtaí a bhaineann le beartais a leagan amach i ngeilleagar beag oscailte.

“Tá T.K. Whitaker ar dhuine de na daoine is mó tionchair i saol poiblí nua-aimseartha na hÉireann.” “Tá tábhacht bhuan ag baint lena chion tairbhe d’fhorbairt eacnamaíoch an Stáit, do chaighdeán an riaracháin phoiblí, agus do bheartais a mhúnlú trí anailís stuama agus comhairle phrionsabálta.”

Tuilleadh Eolais

Martin Grant, martin.grant@centralbank.ie, 086 078 7868