Glacann daltaí scoile ról BCE orthu féin ag Glúin an €uro-Duais na nDaltaí

Thug Banc Ceannais na hÉireann aitheantas d’éachtaí daltaí óga san eacnamaíocht ag an mbabhta ceannais de Ghlúin an €uro-Duais na nDaltaí ar an Aoine 27 Samhain. Bhí an bua ag foireann ó Scoil Pháirc Chill Fhionntain (Sutton Park School) ag an ócáid fhíorúil.

D’éirigh leis na daltaí ó Scoil Pháirc Chill Fhionntain an lámh in uachtar a fháil ar fhoireann Choláiste Pobail Chill Orglan (Killorglin Community College) i ndianchomórtas sa bhabhta ceannais. Ghlac an dá fhoireann ról Chomhairle Rialaithe BCE orthu féin trí anailís a dhéanamh ar an eacnamaíocht agus an ráta úis iomchuí a shocrú don limistéar euro. Rinne an dá fhoireann mionphlé ar na dúshláin atá roimh an limistéar euro faoi láthair agus moladh go hard cumas na ndaltaí anailís a dhéanamh ar thimpeallacht eacnamaíoch atá ag athrú go tapa de thoradh ghéarchéim COVID-19.

Bhronn an Leas-Ghobharnóir, Sharon Donnery, trófaithe ar na foirne agus tharraing sí aird ar éachtaí na ndaltaí a bhain an babhta ceannais amach; “trí pháirt a ghlacadh sa chomórtas seo, léirigh na daltaí ó Scoil Pháirc Chill Fhionntain agus ó Choláiste Pobail Chill Orglan go bhfuil an-tuiscint acu ar phrionsabail na heacnamaíochta agus an bheartais airgeadaíochta, agus léiríodar cruinneas ina gcuid measúnuithe ar na roghanna beartais airgeadaíochta a bhí ar fáil agus ról Chomhairle Rialaithe BCE á ghlacadh orthu féin”.

Agus í ag labhairt faoin bhfoireann bhuaiteach, dúirt sí gur léirigh Scoil Pháirc Chill Fhionntain “sárthuiscint ar shainordú BCE ó thaobh cobhsaíocht praghsanna de agus leagadar amach na rioscaí a bhain leis sin. Thairis sin, dhéileáladar go han-mhaith leis na ceisteanna agus léiríodar mioneolas ar an ábhar.”

Agus í ag trácht ar an tábhacht a bhaineann leis an gcéad ghlúin eile d’eacnamaithe, dúirt an Leas-Ghobharnóir Donnery go bhfuil “an Banc Ceannais meáite ar eacnamaithe na todhchaí a spreagadh. Is chun ár leasa féin é a chinntiú go bhfuil sreafaí de dhaoine óga ann a bhfuil spéis acu san eacnamaíocht agus a bheartóidh slí bheatha a bhaint amach sa réimse seo amach anseo. Bíonn rogha mhaith gairmeacha ar fáil do dhaltaí a dhéanann staidéar ar an eacnamaíocht.”

Leis an gcur i láthair seo, cuirtear bailchríoch ar an obair go léir atá déanta ag na foirne seo le beagnach bliain anuas mar chuid de Ghlúin an €uro-Duais na nDaltaí. Tá lúcháir ar an mBanc Ceannais an babhta ceannais a sheoladh go fíorúil chun éachtaí na bhfoirne iomaíocha a aithint.

Nótaí:

Is é Glúin an €uro-Duais na nDaltaí príomhchomórtas eacnamaíochta na hÉireann do dhaltaí Idirbhliana agus do dhaltaí sa 5ú Bliain.

Bíonn an comórtas á reachtáil ag Banc Ceannais na hÉireann i gcomhpháirt leis an mBanc Ceannais Eorpach agus bíonn sé ar siúl i mbainc cheannais eile sa limistéar euro ag an am céanna. Gach bliain, cuardaímid eacnamaithe óga, éirimiúla na hÉireann chun aithris a dhéanamh ar ról Chomhairle Rialaithe an Bhainc Cheannais Eorpaigh agus chun anailís a dhéanamh ar an ngeilleagar agus ráta úis atá iomchuí dar leo a shocrú don limistéar euro.

Bíonn idir triúr agus cúigear daltaí ar gach foireann agus ainmnítear múinteoir amháin mar mheantóir. Déantar na rannpháirtithe a scrúdú thar thrí bhabhta éagsúla - tráth na gceist, anailís i scríbhinn agus cur i láthair. Na foirne sin a n-éiríonn leo sa tráth na gceist ar líne, téann siad ar aghaidh chuig an dara babhta. Iarrtar orthu sa bhabhta sin anailís a dhéanamh ar dhálaí eacnamaíocha agus ráta úis atá iomchuí dar leo a chinneadh don limistéar euro. Sa bhabhta deiridh, cuireann na foirne a gcuid torthaí i láthair do phainéal eacnamaithe sinsearacha sa Bhanc Ceannais.