Próifíl Bheathaisnéiseach

Gabriel Makhlouf, An Gobharnóir

Chuaigh Gabriel Makhlouf i mbun a chúraim mar Ghobharnóir ar Bhanc Ceannais na hÉireann an 1 Meán Fómhair 2019.  Tá sé ina chathaoirleach ar Choimisiún an Bhainc Ceannais agus is comhalta é de Chomhairle Rialaithe an Bhainc Ceannais Eorpaigh agus den Bhord Eorpach um Riosca Sistéamach, agus is é Gobharnóir Malartach na hÉireann ar an gCiste Airgeadaíochta Idirnáisiúnta. 

Sular tháining sé chuig an mBanc Ceannais, bhí Gabriel ina Rúnaí ar Státchiste na Nua-Shéalainne agus bhí sé ina phríomhchomhairleoir eacnamaíoch agus airgeadais do Rialtas na Nua-Shéalainne idir 2011 agus 2019. Le linn a thréimhse mar Rúnaí, bhí sé i gceannas ar athbhreithnithe ar thrí philéar mhaicreacnamaíocha na Nua Shéalainne (airgeadaíocht, cobhsaíocht airgeadais agus beartas fioscach) agus ar chreat nua do bheartas eacnamaíoch agus do bheartas poiblí a fhorbairt bunaithe ar fholláine idirghlúine. Ina theannta sin, bhí Gabriel ina Ghobharnóir Malartach don Nua Shéalainn sa Bhanc Domhanda, sa Bhanc Infheistíochta do Bhonneagar Áiseach, i mBanc Forbartha na hÁise agus sa Bhanc Eorpach d’Atógáil agus d’Fhorbairt.  Bhí sé ina chomhchathaoirleach freisin ar an gComhairle Baincéireachta Trasthasmánach.

Roimhe sin, d’oibrigh Gabriel i róil éagsúla i státseirbhís na Ríochta Aontaithe; ina measc sin, bhí róil aige sa bheartas cánach intíre agus idirnáisiúnta, agus in oibríochtaí mórscála. Bhí sé ina chathaoirleach ar Choiste um Beartas Fioscach na hEagraíochta um Chomhar agus um Fhorbairt Eacnamaíoch agus bhí sé freagrach as seirbhís baincéireachta Rialtas na Ríochta Aontaithe.

Marcella Flood, An Príomh-Oifigeach Oibríochtaí

Ceapadh Marcella Flood ina Príomh-Oifigeach Oibríochtaí ar an 20 Márta 2023. Mar Phríomh-Oifigeach Oibríochtaí, tá sí freagrach as réimsí príomhoibríochtaí a stiúradh sa Daon-Stiúrthóireacht, sa Stiúrthóireacht um Bainistíocht Faisnéise agus Teicneolaíocht Faisnéise, sa Stiúrthóireacht um Airgeadas agus Feidhmíocht Ghnó, mar aon le Seirbhísí Airgeadra, Ionaid Oibre agus Rialála,  Ina theannta sin, tá sí ina comhalta den Fhoireann Ceannaireachta Feidhmiúcháin.

Sular thosaigh sí ag obair sa Bhanc Ceannais, bhí Marcella ina Bainisteoir ar an gClár um Bunathrú in Allianz SE agus roimhe sin bhí sí ina Príomh-Oifigeach Oibríochtaí Réigiúnach don Eoraip Thuaidh, Láir agus Thoir in Allianz Partners. Tá taithí shuntasach Feidhmiúcháin aici ó róil éagsúla C-suite a bhí aici agus fuair sí saineolas domhain teicniúil ar Oibríochtaí, ar Theicneolaíocht, ar Athrú agus Bunathrú in Allianz, Microsoft, Bank of Ireland mar aon le gnólachtaí nuathionscanta agus sainchomhairleachtaí. Tá Marcella ina Stiúrthóir Cairte agus bhí poist éagsúla Boird aici, lena n-áirítear san Údarás Árachais Sláinte agus i gCumann Scléaróise Iolraí na hÉireann. 

Vasileios Madouros, Leas-Ghobharnóir, Cobhsaíocht Airgeadaíochta agus Airgeadais

Ceapadh Vasileios Madouros ina Leas-Ghobharnóir, Cobhsaíocht Airgeadaíochta agus Airgeadais, i mí na Samhna 2022. Sa ról seo, déanann sé maoirsiú ar na Rannáin um Eacnamaíocht & Staidreamh, um Chobhsaíocht Airgeadais agus um Oibríochtaí Airgeadais agus stiurann sé rannpháirtíocht le páirtithe leasmhara intíre, Eurochórais agus idirnáisiúnta a dhéanann ionadaíocht don Bhanc Ceannais ar ábhair níos leithne maidir leis an gcóras airgeadais. Is Comhalta ex-officio de Choimisiún an Bhainc Ceannais é Vasileios agus is malartach don Ghobharnóir é ar Chomhairle Rialaithe an Bhainc Cheannais Eorpaigh. 

Roimhe seo, bhí Vasileios ina Stiúrthóir ar Chobhsaíocht Airgeadais.  Sa ról sin, bhí sé freagrach as obair an Bhainc Ceannais chun faireachán a dhéanamh ar bhagairtí don chobhsaíocht airgeadais agus as comhairle a thabhairt maidir le húsáid uirlisí marcrastuamachta, nó idirghabhálacha beartais eile, chun na rioscaí sin a mhaolú. Bhí Vasileios freagrach freisin as feabhas a chur ar ullmhacht agus ar chumas bainistíochta an Bhainc Ceannais i leith géarchéim airgeadais mar aon le hullmhúchán a dhéanamh i gcomhair réiteach ordúil institiúidí airgeadais ábhartha agus as réiteach den sórt sin a bhainistiú. Sa ról sin, bhí Vasileios ina chomhalta de Bhord Iomlánach an Bhoird Réitigh Aonair.  

Sula ndeachaigh sé i mbun a phoist leis an mBanc Ceannais, chaith sé formhór dá shaol oibre le Banc Shasana. Chuimsigh a chuid oibre i mBanc Shasana mórán réimsí a bhain le cobhsaíocht airgeadais, lena n-áirítear forbairt beartais macrastuamachta, tástáil struis, airgeadais idirnáisiúnta, beartas stuamachta agus measúnú riosca macra-airgeadais.

Tá B.Sc san Eacnamaíocht ó Ollscoil Warwick agus M.Sc san Eacnamaíocht ó Birkbeck College, University of London ag Vasileios.

Derville Rowland, Leas-Ghobharnóir, Cosaint Tomhaltóirí agus Infheisteoirí

Tá Derville Rowland ina Leas-Ghobharnóir i mBanc Ceannais na hÉireann. Roimhe seo, bhí sí ina hArd-Stiúrthóir ar Iompar Airgeadais. Tá sí freagrach as Cosaint Tomhaltóirí agus Infheisteoirí, as formhaoirsiú a dhéanamh ar Iompar Miondíola, as an Maoirseacht ar Urrúis agus ar Mhargaí, mar aon leis an maoirseacht ar Fhrithsciúradh Airgid, Smachtbhannaí Airgeadais agus Forfheidhmiú.

Ina theannta sin, tá Derville in comhalta de bhord bainistíochta agus de bhord maoirseoirí an Údaráis Eorpaigh um Urrúis agus Margaí (ESMA) agus tá sí ina cathaoirleach ar a Buanchoiste um Sheirbhísí Bainistíochta Infheistíochta.  Tá Derville ina comhalta boird den Eagraíocht Idirnáisiúnta um Choimisiúin Urrús (IOSCO) agus tá sí ina leas-chathaoirleach ar Choiste Réigiún IOSCO.

Sular thosaigh Derville ag obair sa Bhanc, bhí ina habhcóide sa Ríocht Aontaithe, áit inar bhain sí Céim sa Dlí amach agus ina bhfuair sí oiliúint abhcóide i Londain (Scoil Dlí Óstaí na Cúirte). Ina dhiaidh sin, bhain sí céim BL amach in Óstaí an Rí i mBaile Átha Cliath mar aon le Dioplóma i nDlí an Airgeadais Fheidhmigh. 

Leas-Ghobharnóir, Rialáil Airgeadais

Ceapadh Mary-Elizabeth McMunn ina Leas-Ghobharnóir, Rialáil Airgeadais, ar an 1 Eanáir 2025.  Is comhalta ex-officio de Choimisiún an Bhainc Ceannais í agus is comhalta í de Bhord Maoirseachta an Bhainc Ceannais Eorpaigh (BCE) agus de Bhord Ginearálta an Bhoird Eorpaigh um Riosca Sistéamach.

Mar Leas-Ghobharnóir, Rialáil Airgeadais, tá Mary-Elizabeth i gceannas ar an rialáil agus ar an maoirseacht ar institiúidí creidmheasa, ar chomhair chreidmheasa agus institiúidí íocaíochta/airgid leictreonaigh agus ar an earnáil árachais.  Tá sí freagrach freisin as na feidhmeanna um riosca maoirseachta, um chreat maoirseachta, um anailísíocht mhaoirseachta agus um shonraí maoirseachta sa Bhanc Ceannais, agus tá sí freagrach as beartas rialála an Bhainc a stiúradh ar leibhéal náisiúnta, Eorpach agus domhanda.  Tá sí ina cathaoirleach ar Choiste Riosca Maoirseachta an Bhainc Ceannais. 

Sular ceapadh ina Leas-Ghobharnóir í, bhí Mary-Elizabeth ina Stiúrthóir ar an Maoirseacht ar Bhaincéireacht, Íocaíochtaí agus ar Chomhair Chreidmheasa ó 2018. Bhí sí freagrach as maoirseacht agus údarú na mbanc, na n-institiúidí íocaíochta agus na n-institiúidí ríomh-airgid, agus as Clárlann na gComhar Creidmheasa. Thosaigh Mary-Elizabeth ag obair sa Bhanc Ceannais i 1997 agus bhí róil shinsearacha éagsúla aici i réimse an riosca maoirseachta, réimse na maoirseachta ar bhaincéireacht agus réimse na maoirseachta ar árachas, agus chaith sí seal ag déanamh obair chomhairleach freisin.

Tá MSc san Infheistíocht agus Cistíocht aici ó Ollscoil Chathair Bhaile Átha Cliath, BA san Eacnamaíocht ó Choláiste na hOllscoile, Baile Átha Cliath, Dioplóma i dTreoir Cuideachta ó Institiúid na Stiúrthóirí agus is céimí de Scoil Ghnó Michael Smurfit í.

Annemarie Britz, An Stiúrthóir ar Airgeadas agus ar Fheidhmíocht Ghnó

Ceapadh Annemarie Britz ina Stiúrthóir ar Airgeadas agus ar Fheidhmíocht Ghnó ar an 4 Eanáir 2024.

Thosaigh sí ag obair sa Bhanc Ceannais in 2019 mar Cheannasaí ar an Rannán um Rialú Airgeadais.

Sula ndeachaigh sí i mbun oibre sa Bhanc Ceannais, chaith Annemarie an chuid ba mhó dá gairmréim ag obair san earnáil phríobháideach san Afraic Theas, áit a raibh poist mar phríomhoifigeach airgeadais aici in áiteanna éagsúla, agus ina dhiaidh sin, chuaigh sí i mbun oibre i mBanc Cúlchiste na hAfraice Theas, áit ar shealbhaigh sí poist mar Leas-Phríomhoifigeach Airgeadais agus mar Leas-Cheannasaí ar Mhargaí Airgeadais.

Déanann sí ionadaíocht don Bhanc Ceannais mar chomhalta de Choiste Buiséid agus de Choiste Cuntasaíochta agus Ioncam Airgeadaíochta BCE.

Tá céim onóracha Baitsiléara Tráchtála sa Chuntasaíocht aici, mar aon le Teastas i dTeoiric na Cuntasaíochta ó Ollscoill Pretoria (an Afraic Theas), agus is Cuntasóir cailithe Cairte aici.

Glenn Calverley, An Stiúrthóir ar Straitéis agus Rialachas

Ceapadh Glenn Calverley in a Stiúrthóir ar Straitéis agus Rialachas ar an 1 Nollaig 2021.

Thosaigh sé ag obair sa Bhanc Ceannais in 2015 agus, roimh an gceapachán seo, bhí sé ina Cheannasaí ar Riosca Eagraíochtúil agus, ina dhiaidh sin, ar Straitéis agus Fadbhreathnaitheacht. Sula ndeachaigh sé i mbun poist sa Bhanc Ceannais, chaith Glenn breis agus 15 bliana i bpoist ardbhainistíochta éagsúla, sa bhaincéireacht tráchtála den chuid is mó, i réimsí na bainistíochta riosca agus an athraithe eagraíochtúil. 

Rinne sé ionadaíocht don Bhanc Ceannais ar chomhlachtaí éagsúla de chuid an Eurochórais, lena n-áirítear an Coiste Bainistíochta Riosca agus mar Chathaoirleach ar Thascfhórsa an Eurochórais um Athléimneacht.

Tá Msc Gnó aige ó Choláiste na Tríonóide, Baile Átha Cliath, mar aon le Msc san Eacnamaíocht Pholaitiúil ó Scoil Ghnó Londan.

Mark Cassidy, Stiúrthóir ar Chobhsaíocht Airgeadais 

Ceapadh Mark Cassidy ina Stiúrthóir ar Chobhsaíocht Airgeadais ar an 1 Samhain 2022. Tá sé freagrach as obair an Bhainc Ceannais chun faireachán a dhéanamh ar bhagairtí don chobhsaíocht airgeadais agus chun comhairle a thabhairt maidir le húsáid uirlisí marcrastuamachta, nó úsáid beartais idirghabhála eile, chun na rioscaí sin a mhaolú. Tá Mark freagrach freisin as feabhas a chur ar ullmhacht i leith géarchéim airgeadais agus ar chumas bainistíochta an Bhainc Ceannais. Tá sé freagrach chomh maith as ullmhúchán i gcomhair réiteach ordúil institiúidí airgeadais ábhartha agus as an réiteach sin a bhainistiú. Tá Mark ina chomhalta de Bhord Iomlánach an Bhoird Réitigh Aonair.

Bhí Mark ina Leas-Ghobharnóir Gníomhach, Cobhsaíocht Airgeadaíochta agus Airgeadais, ón 1 Iúil 2022 go dtí an 31 Deireadh Fómhair 2022. Roimhe sin, bhí sé ina Stiúrthóir ar Eacnamaíocht agus Staidreamh, ról a bhí aige ó mhí na Nollag 2017. Sa ról deireanach sin, bhí sé freagrach as an Rannán um Beartas Airgeadaíochta, an Rannán um Anailís Eacnamaíoch na hÉireann agus an Rannán Staidrimh. Roimh an gceapachán sin, bhí Mark ina Cheannasaí ar Chobhsaíocht Airgeadais agus bhí sé ina Cheannasaí ar Bheartas Airgeadaíochta.

Rinne Mark ionadaíocht don Bhanc Ceannais ar raon coistí Eurochórais agus idirnáisiúnta lena n-áirítear an Coiste um Chobhsaíocht Airgeadais de chuid BCE, an Coiste um Beartas Airgeadaíochta, an Coiste um Chaidreamh Idirnáisiúnta agus an Coiste um Maoirseacht ar Bhaincéireacht. Tá sé ina Chathaoirleach freisin ar Bhord Iontaobhaithe Scéim Aoisliúntais an Bhainc agus bhí sé ina Chathaoirleach ar Thascfhórsa Brexit sa Bhanc Ceannais.

Tá breis is fiche bliain de thaithí aige sa bhaincéireacht cheannais agus sa saol acadúil agus tá Ph.D san Eacnamaíocht aige ó Choláiste na Tríonóide, Baile Átha Cliath.

Gerry Cross, An Stiúrthóir ar Bheartas agus Riosca

Ceapadh Gerry Cross ina Stiúrthóir ar Rialáil Airgeadais - Beartas agus Riosca i mí Bealtaine 2015.  Tá sé i gceannas ar obair an Bhainc Ceannais ar bheartas rialála i dtaca le hiompar stuamachta agus margaí agus ar a chreat maoirseoireachta riosca (PRISM). Is comhalta é de Bhord Stiúrthoirí an Údaráis Baincéireachta Eorpaigh agus is comhalta malartach de chuid an Údarais um Árachas agus Pinsin Cheirde é. Tá sé ina chomhchathaoirleach ar Bhuanchoiste ÚBE um Rialáil agus um Beartas.

Tá taithí ghairnmiúil leathan ag Gerry i réimse na rialála seirbhísí airgeadais. Sular tháinig sé chuig an mBanc Ceannais, d’oibrigh sé sa Choimisiún Eorpach, in Údarás Seirbhísí Airgeadais na Ríochta Aontaithe, in Fortis Group, san Institiúid Airgeadais Idirnáisiúnta agus i gCumann Margaí Airgeadais na hEorpa.

Domhnall Cullinan, An Stiúrthóir ar Mhaoirseacht ar Árachas

Ceapadh Domhnall Cullinan ina Stiúrthóir ar Mhaoirseacht ar Árachas i Meán Fómhair 2019. Mar Stiúrthóir ar Mhaoirseacht ar Árachas, tá Domhnall freagrach as an maoirseacht ar 200 gnólacht saoil, neamhshaoil agus athárachais a stiúradh. Tá Domhnall ar Bhord Maoirseoirí an Údaráis Eorpaigh um Árachas agus Pinsin Cheirde (ÚEÁPC) agus ar Choiste Stiúrtha an Tionscadail um Idirphlé AE-SA maidir le hÁrachas. Roimhe seo, bhí Domhnall ina ionadaí do Bhanc Ceannais na hÉireann ag an Údarás Baincéireachta Eorpach (ÚBE) agus ar an Tascfhórsa um Ghníomhaíocht Airgeadais (FATF).

Chuaigh Domhnall i mbun oibre sa Bhanc Ceannais in 2003. Bhí róil éagsúla sa mhaoirseacht ar árachas aige sular ceapadh é ina Cheannasaí ar Mhaoirseacht ar Árachas Ginearálta i Meitheamh 2012. I mí an Mheithimh 2014, ceapadh Domhnall ina Cheannasaí ar an Rannán um Fhrithsciúradh Airgid sa Bhanc Ceannais sular aistrigh sé ar ais chuig maoirseacht ar árachas in 2019. Bhí Domhnall ina iontaobhaí de chuid Scéim Aoisliúntais an Bhainc Ceannais agus Údarás Seirbhísí Airgeadais na hÉireann ar feadh sé bliana ó mhí na Samhna 2015 go dtí mí na Samhna 2021. Tá Domhnall ina chomhalta den Choiste um um Riosca Maoirseachta, den Choiste um Fheidhmíocht & Acmhainní agus den Choiste Beartas. Ina theannta sin, tá Domhnall ina chomhalta den Mheitheal um Éagsúlacht & Ionchuimsiú sa Bhanc Ceannais.

Sular thosaigh sé ag obair sa Bhanc Ceannais, chaith Domhnall dhá bhliain mar Cheannasaí ar Imscrúduithe agus Comhlíonadh leis an Rialtóir Pinsean in Éirinn. Sula ndeachaigh sé i mbun oibre leis an Rialtóir Pinsean, chaith Domhnall breis agus deich mbliana ag obair sa tionscal Saoil agus Pinsean.  

Tá MBS ag Domhnall sa Chleachtas Gnó (Foras Bainistíochta na hÉireann/Coláiste na hOllscoile, Corcaigh), tá teideal QFA FLIA aige, is Iontaobhaí Cáilithe Pinsean é (Coláiste Náisiúnta na hÉireann) agus tá Dioplóma aige sa Rialachas Corparáideach (Institiúid an Rialachais Chorparáidigh/Ollscoil Chaladónach Ghlaschú).

Séana Cunningham, An Stiúrthóir ar Fhorfheidhmiú agus ar Fhrithsciúradh Airgid  

Ceapadh Séana Cunningham ina Stiúrthóir ar Fhorfheidhmiú agus ar Fhrithsciúradh Airgid i mí Eanáir 2018. Roimh an gceapachán seo, bhí sí ina Ceannasaí ar an Rannán Comhairleach um Fhorfheidhmiú agus ina Leas-Cheannasaí ar an Rannán um Fhrithsciúradh Airgid sa Bhanc Ceannais. Chuaigh sí i mbun oibre sa Bhanc Ceannais in 2011 tar éis di breis agus deich mbliana a chaitheamh ag obair mar aturnae i gcleachtas príobháideach in Éirinn agus sa Ríocht Aontaithe.

Louise Dennehy, An Príomh-Oifigeach Faisnéise

Ceapadh Louise Dennehy ina Príomh-Oifigeach Faisnéise i Meán Fómhair 2019.  Chuaigh sé i mbun poist mar Cheannasaí ar Sheachadadh TF sa Bhanc Ceannais i mí Aibreáin 2017.  Tá breis agus 25 bliana taithí ag Louise sa teicneolaíocht faisnéise san earnáil seirbhísí airgeadais agus bhí róil cheannaireachta TF aici le linn an ama sin.  Tá céimeanna i réimsé na heolaíochta agus na teicneolaíochta faisnéise ag Louise ón gColáiste Ollscoile, Baile Átha Cliath agus ó Choláiste na Trionóide, Baile Átha Cliath.

Patricia Dunne, An Stiúrthóir ar Mhaoirseacht ar Urrúis agus ar Mhargaí

Ceapadh Patricia Dunne ina Stiúrthóir ar Mhaoirseacht ar Urrúis agus ar Mhargaí ar an 13 Nollaig 2021. Tá an Stiúrthóireacht um Maoirseacht ar Urrúis agus ar Mhargaí freagrach as maoirseacht a dhéanamh ar mhargaí príomha agus tánaisteacha urrús; as sláine an mhargaidh; maoirseacht ar iompar an mhargaidh mórdhíola agus as maoirseacht a dhéanamh ar chistí infheistíochta, ar sholáthraithe seirbhísí cistí agus ionaid trádála.

Tá os cionn tríocha bliain de shaineolas rialála, maoirseachta agus beartais ag Patricia san earnáil bainistíochta sócmhainní, in earnáil na gcistí infheistíochta agus san earnáil baincéireachta. Bhain sí leas as an saineolas sin chun tionchar dearfach a imirt ar cheannaireacht agus ar threo straitéiseach na rialála airgeadais agus an Bhainc Ceannais níos leithne. Sular ceapadh ina Stiúrthóir í, bhí sí ina Ceannasaí ar Mhaoirseacht ar Mhargaí, áit a raibh sí freagrach as maoirseacht agus faireachas a dhéanamh ar mhargaí airgeadais, lena n-áirítear forbairt na maoirseachta um anailísíocht chomhtháite sonraí agus um anailís riosca. Chuir sí feabhas ar éifeachtacht an Bhainc Ceannais i réimse na forbartha beartais Eorpaigh agus idirnáisiúnta agus rannchuidigh sí le beartas agus reachtaíocht rialála na hEorpa a cheapadh maidir le bainistíocht sócmhainní agus cistí infheistíochta trí ionadaíocht a dhéanamh don Bhanc Ceannais ar Bhuanchoiste um Sheirbhísí Bainistíochta Infheistíochta de chuid an Údaráis Eorpaigh um Urrúis agus Margaí (ESMA) agus trí chathaoirleacht a dhéanamh ar mheithlí éagsúla ESMA. 

Robert Kelly, Stiúrthóir ar Eacnamaíocht agus Staidreamh

Ceapadh Robert Kelly ina Stiúrthóir ar Eacnamaíocht agus Staidreamh ar an 1 Feabhra 2023. Tá sé freagrach as réamhaisnéisí eacnamaíocha agus anailís eacnamaíoch intíre, lena gcuirtear le fobairt bheartas eacnamaíochta an limistéir euro, agus as staidreamh airgeadais na hÉireann a thiomsú mar bhonn eolais do chinnteoireacht an Bhainc Ceannais Eorpaigh, an Rialtais, gnólachtaí seirbhísí airgeadais agus an phobail.

Thosaigh Robert ag obair sa Bhanc Ceannais in 2009. Roimh an gceapachán áirithe seo, bhí sé ina Cheannasaí ar an Rannán Macra-Airgeadais agus bhí róil bainistíochta rannáin aige sa Stiúrthóireacht Eacnamaíochta agus Staidrimh agus sa Stiúrthóireacht um Chobhsaíocht Airgeadais. Rinne sé ionadaíocht don Bhanc Ceannais ar raon coistí Eurochórais agus idirnáisiúnta lena n-áirítear an Coiste um Chobhsaíocht Airgeadais de chuid BCE agus Coiste Comhairleach Teicniúil BERS.

Bhí Robert ag teagasc in Ollscoil Mhá Nuad agus i gColáiste na Tríonóide, Baile Átha Cliath, agus tá taighde foilsithe aige ar dhinimic chreidmheasa, agus ar bheartais airgeadaíochta agus macrastuamachta i bpríomhfhoilseacháin phiarmheasúnaithe.

Tá B.A, M.A. agus Ph.D san Eacnamaíocht agus Airgeadas aige ó Ollscoil Mhá Nuad. 

Colm Kincaid, An Stiúrthóir ar Chosaint Tomhaltóirí

Ceapadh Colm Kincaid ina Stiúrthóir ar an Rannán um Chosaint Tomhaltóirí ar an 1 Deireadh Fómhair 2021.  Roimh an gceapachán seo, bhí sé ina Stiúrthóir ar Mhaoirseacht ar Urrúis agus ar Mhargaí, agus roimhe sin fós, ina Cheannasaí ar an Rannán um Chosaint Tomhaltóirí - Beartas & Údaruithe agus ina Leas-Cheannasaí ar an Rannán Dlí sa Bhanc Ceannais. Chuaigh sé i mbun oibre sa Bhanc Ceannais in 2004 tar éis dó bheith ag cleachtadh mar aturnae i Londain agus i mBaile Átha Cliath.

Anne Marie McKiernan, Stiúrthóir ar Oibríochtaí Airgeadais

D’fhill Anne Marie ar Bhanc Ceannais na hÉireann i Meán Fómhair 2023 chun glacadh leis an ról mar Stiúrthóir ar Oibríochtaí Airgeadais. Sa ról seo, tá sí freagrach as formhaoirsiú a dhéanamh ar phríomhghnéithe chlár comhardaithe Bhanc Ceannais na hÉireann, as sócmhainní infheistíochta an Bhainc Ceannais a bhainistiú, as oibríocht bheartas airgeadaíochta an Eurochórais a fhorbairt agus a chur chun feidhme, as an ngné Éireannach de bhonneagair íocaíochtaí agus socraíochtaí an Eurochórais a oibriú, agus as sábháilteacht agus éifeachtúlacht íocaíochtaí agus socraíochtaí urrús a chur chun cinn. Tá sí ina cathaoirleach ar Choiste Comhairleach Infheistíochta Pinsin de chuid an Bhainc Ceannais.

D’fhill Anne Marie ar an mBanc Ceannais tar éis 6 bliana i Washington DC, áit a raibh sí ina comhalta de Bhord an Chiste Airgeadaíochta Idirnáisiúnta agus Ghrúpa an Bhainc Dhomhanda. Sa ról sin, rinne sí ionadaíocht d’Éirinn agus do na tíortha i Muir Chairib. Bhí poist shinsearacha éagsúla aici ar fud an Bhainc Ceannais, lena n-áirítear mar Chomhairleoir Speisialta don Ghobharnóir Lane ar Chúrsaí Idirnáisiúnta, mar cheannasaí ar fheidhmeanna airgeadais agus neamhairgeadais Riosca an Bhainc, mar Chláraitheoir na gComhar Creidmheasa, agus bhí róil shinsearacha aici sa bheartas airgeadaíochta, sa chobhsaíocht airgeadais, san eacnamaíocht, agus straitéis. Rinne sí ionadaíocht don Bhanc Ceannais ar raon coistí Eurochórais agus Idirnáisiúnta, agus tá sí ina comhalta anois de Thascfhórsa Ardleibhéil BCE ar Airgeadra Digiteach Bainc Ceannais (CBDC). Tá céimeanna ag Anne Marie sa Mhatamaitic agus san Eacnamaíocht, mar aon le Máistreacht agus Dioplóma ó Institiúid na Stiúrthóirí. Roimh an mBanc Ceannais, bhí sí ag obair i bhforbairt idirnáisiúnta sa Ríocht Aontaithe, san Afraic Theas agus i Washington DC. 

William Molloy, An Príomh-Oifigeach Daoine

Ceapadh William Molloy ina Phríomh-Oifigeach Daoine ar an 1 Bealtaine 2023.  Tá sé freagrach as forbairt agus cur chun feidhme straitéis daoine an Bhainc Ceannais lena gcumasófar agus lena n-éascófar forbairt eagraíochta forchéimnithí, éifeachtaí, éifeachtúla, a bheidh mar áit oibre shásúil.

Sular ghlac sé leis an bpost seo, bhí William ina Stiúrthóir ar Oibríochtaí Airgeadais sa Bhanc Ceannais agus bhí sé freagrach as formhaoirsiú a dhéanamh ar ghnéithe tábhachtacha de chlár comhardaithe an Bhainc Ceannais, as beartas airgeadaíochta an Eurochórais a chur chun feidhme in Éirinn, as sócmhainní infheistíochta an Bhainc Ceannais a bhainistiú, as an ngné Éireannach de chóras mear-aistrithe ollsocraíochtaí fíor-ama (TARGET2) a oibriú agus as sábháilteacht agus éifeachtúlacht córas íocaíochta agus socraíochta in Éirinn agus san Eurochóras a chur chun cinn.

Ina theannta sin, bhí poist cheannaireachta ag William sa Rannán um Íocaíochtaí & Socraíochtaí Urrús, sa Rannán um Maoirseacht ar Bhaincéireacht, sa Rannán um Margaí Airgeadais agus sa Rannán um Riosca Eagraíochtúil.  Rinne sé ionadaíocht don Bhanc Ceannais ar raon coistí Eurochórais agus idirnáisiúnta, lena n-áirítear Tascfhórsaí Ardleibhéil BCE ar Airgeadra Digiteach Bainc Ceannais (CBDC) agus Infheistíochtaí Freagracha agus Inbhuanaithe maidir le hAthrú Aeráide (SRI).  

Tá B.A. aige sa Stair, mar aon le Baitsiléir i Seirbhísí Airgeadais, M.A. sa Stair, M.Sc sa Bhainistíocht Riosca agus MBS i gCleachtas Gnó.

Karen O'Leary, An Stiúrthóir ar Sheirbhísí Airgeadra, Ionaid Oibre agus Rialála

Ceapadh Karen O’Leary ina Stiúrthóir ar Sheirbhísí Airgeadra, Ionaid Oibre & Rialála ar an 1 Márta 2025. Sa ról seo, beidh Karen freagrach as maoirsiú a dhéanamh ar sholáthar seirbhísí bunriachtanacha rialála mar chuid de shainordú rialála níos leithne an Bhainc; a áirithiú go ndéanfar seirbhísí airgeadra an Bhainc a sheachadadh; agus ról ríthábhachtach a ghlacadh maidir le stiúradh Straitéis an Lárionaid Airgeadra, lena n-áirítear forbairt agus seachadadh Lárionaid nua, bonneagar ríthábhachtach de chuid an Stáit.

Thosaigh Karen ag obair i mBanc Ceannais na hÉireann in 2002 sa réimse um Fhaisnéis & Oideachas do Thomhaltóirí, sula ndeachaigh sí ar iasacht chuig an nGníomhaireacht Náisiúnta do Thomhaltóirí, áit a raibh sí ina Príomh-Fheidhmeannach agus níos déanaí bhí sí ina Comhalta Coimisiúin den Choimisiún um Iomaíocht agus Cosaint Tomhaltóirí (CCPC). D’fhill sí ar an mBanc in 2017 mar Cheannasaí ar Fhorbairt Eagraíochta sa Stiúrthóireacht Acmhainní Daonna agus ina dhiaidh sin bhí sí ina Ceannasaí ar Íocaíochtaí & Socraíochtaí Urrús. 

Tá Máistreacht ag Karen sa Ghnó (Ceannaireacht & Cleachtas Bainistíochta) ó Smurfit COBÁC, mar aon le céim sa Mhargaíocht (ó Ollscoil Teicneolaíochta Bhaile Átha Cliath) agus Dioplóma iarchéime sa Dlí Iomaíochta (ó Kings College, Londain).  

Adrian Varley, An Stiúrthóir ar Anailís Stuamachta agus ar Chigearachtaí

Ceapadh Adrian Varley ina Stiúrthóir ar Anailís Stuamachta agus ar Chigearachtaí ar 1 Feabhra 2018. Oibríonn se i dteannta na stiúrthóirí ar mhaoirseoireacht stuamachta don earnáil árachais, don earnáil bhaincéireachta agus don earnáil bainistíochta sócmhainní agus tá sé freagrach as na hainailisithe riosca agus as na cigirí a thacaíonn leis na foirne maoirseorieachta a dhíríonn ar ghnóthais ar leith. Tá sé freagrach as an Rannán um Anailís Riosca, um Anailís Sonraí agus um Thuairisciú, as an Rannán um Rialachas agus um Riosca Oibríochtúil agus as an Ránnán um Rioscaí Airgeadais.

Thosaigh Adrian ag obair leis an mBanc Ceannais in 2010 agus roimh an gceapachán seo, bhí sé ina Cheannasaí ar an Rannán um Mhaoirseoireacht ar Bhaincéireacht. Tá PhD sa Mhatamaitic aige ó Warwick University agus tá breis is 20 bliain taithí aige sa saol acadúil, sa bhaincéireacht infheistíochta agus sa mhaoirseacht stuamachta.

Elaine Byrne, Cláraitheoir Gníomhach na gComhar Creidmheasa

Ceapadh Elaine Byrne mar Chláraitheoir na gComhar Creidmheasa ar an 21 Samhain 2022. Roimhe seo, bhí ról Leas-Chláraitheoir na gComhar Creidmheasa aici le freagracht feidhme as Beartas agus Athstruchtúrú. Tá Elaine ina Cathaoirleach ar an Líonra Idirnáisiúnta de Rialtóirí Comhar Creidmheasa (ICURN).

Thosaigh Elaine ag obair sa Bhanc Ceannais i 1987 agus bhí poist cheannaireachta aici sa Rannán um Maoirseacht ar Bhaincéireacht, sa Rannán Dlí agus Airgeadais agus i gClárlann na gComhar Creidmheasa, lena n-áirítear mar Leas-Chláraitheoir na gComhar Creidmheasa ó 2006 i leith. Ceapadh Elaine mar ainmní an Bhainc Ceannais ar bhord na heagraíochta reachtúla, an Bord um Athstruchtúrú Comhar Creidmheasa (ReBo), nuair a bunaíodh é in 2013. Tá sí ina Cathaoirleach reatha ar an Líonra Idirnáisiúnta de Rialtóirí Comhar Creidmheasa (ICURN), an líonra domhanda maidir le maoirseacht ar chomharinstitiúidí airgeadais.

Sula ndeachaigh sí i mbun oibre sa Bhanc Ceannais, cháiligh Elaine mar Chuntasaóir Cairte le KPMG.   Tá BComm ag Elaine ón gColáiste Ollscoile, Baile Átha Cliath, mar aon le Dioplóma i dTreoir Cuideachta ó Institiúid na Stiúrthóirí, agus in 2022 glacadh léi mar Stiúrthóir Cairte in Institiúid na Stiúrthóirí i Londain.