I Rialacháin FBM agus sa Chód um Chosaint Tomhaltóirí de chuid an Bhainc Ceannais, leagtar amach ceanglais nach mór d’iasachtóirí rialáilte (seachas comhair chreidmheasa) a chomhlíonadh. I Rialacháin FBM, áirítear cosaintí éagsúla do chustaiméirí FBM a bhfuil riaráistí ag bagairt orthu nó a bhfuil riaráistí acu agus cuirtear de cheangal ar iasachtóirí an méid seo a leanas a dhéanamh:

• Na cúiseanna sonracha atá le diúltú do chreidmheas nó le haistarraingt chreidmheasa a thabhairt i scríbhinn d’iasachtaithe
• Beartais agus nósanna imeachta a bheith i bhfeidhm acu a mbeidh de chuspóir lárnach acu cabhrú le hiasachtaithe a gcuid deacrachtaí airgeadais a réiteach
• Dul i dteagmháil le hiasachtaithe a bhfuil riaráistí acu ar feadh 15 lá oibre, d’fhonn an chúis atá leis na riaráistí a aithint.  Ar an gcaoi seo, beidh an iasachtóirí in ann a mheas cibé acu an ceart go mbeadh feidhm ag na ceanglais a chuirtear ar ghnólachtaí chun déileáil le hiasachtaithe a bhfuil deacrachtaí airgeadais acu maidir leis na hiasachtaithe sin. 
• Painéal Achomhairc inmheánach a bheith i bhfeidhm acu chun gur féidir achomharc a dhéanamh in aghaidh cinntí áirithe a dhéanfaidh gnólacht.  

Má tá deacracht airgeadais agat nó má ta deacracht airgeadais ag bagairt ort, is chun do leas é bheith ag plé le d’iasachtóir i ndáil leis na deacrachtaí airgeadais sin. Má dhéanann tú teagmháil le d’iasachtóir, ní mór do d’iasachtóir athbhreithniú láithreach a dhéanamh ar chomhaontuithe do shaoráidí creidmheasa, ar do shocruithe malartacha agus d’urrús, de réir mar is cuí, agus ní mór dó toradh an athbhreithnithe sin a chur in iúl duit.

Chun tuilleadh eolais a fháil, breathnaigh ar ár bhfíseán mínithe: “Tacaíocht do FBManna.”

Má tá deacracht airgeadais ag do ghnó, nó má tá deacracht airgeadais ag bagairt air, labhair le d’iasachtóir a luaithe is féidir. Ná tabhair neamhaird ar an bhfadhb.

Is chun do leasa féin é bheith ag plé le d’iasachtóir. Má dhéanann tú teagmháil le d’iasachtóir ag céim luath, b’fhéidir nach rachaidh staid airgeadais do ghnó in olcas.

Faoi Rialacháin FBM, tá an rogha agat athbhreithniú láithreach a dhéanamh le d’iasachtóir ar shaoráidí creidmheasa do ghnó, ar shocruithe malartacha do ghnó agus ar urrús do ghnó.

Ní mór do d’iasachtóir leabhrán eolais a thabhairt duit ina míneofar, i measc nithe eile, an nós imeachta atá aige chun plé le hiasachtaithe a bhfuil deacracht airgeadais acu, mar aon leis na hamlínte cuí.

Tar éis dó athbhreithniú a dhéanamh ar staid airgeadais do ghnó, b’fhéidir go dtairgfidh d’iasachtóir socrú malartach duit.

Is ionann socrú malartach agus comhaontú nua le d’iasachtóir chun dul i ngleic le deacrachtaí airgeadais do ghnó.

Tá an Banc Ceannais ag súil leis go mbeidh iasachtóirí ag plé leat– i gcomhréir leis an gCód um Chosaint Thomhaltóirí agus le Rialacháin FBM – chun go gcuirfí réitigh oiriúnacha ar fáil agus chun go gcuirfí a oiread iasachtaithe agus is féidir ar a mboinn arís ó thaobh a gcuid fiach a aisíoc.

Má tá deacracht airgeadais ag do ghnó, nó má tá imní ort go mbeidh deacracht airgeadais aige, ba chóir duit labhairt le d’iasachtóir a luaithe is féidir. Níor chóir duit neamhaird a thabhairt ar an bhfadhb.

 Is chun do leasa féin é bheith ag plé le d’iasachtóir.

Má dhéanann tú teagmháil le d’iasachtóir ag céim luath, b’fhéidir nach rachaidh staid airgeadais do ghnó in olcas. Tá oibleagáid ar d’iasachtóir athbhreithniú láithreach ar imthosca airgeadais do ghnó a thairiscint duit, d’fhonn cabhrú le do ghnó a chuid deacrachtaí airgeadais a réiteach. B’fhéidir go dtairgfidh d’iasachtóir socrú malartach duit chun an t-ualach airgeadais ar do ghnó a mhaolú, nó b’fhéidir go dtairgfidh sé creidmheas nua do do ghnó chun cabhrú leis fanacht i mbun trádála sa tréimhse chrua seo.

I gcás ina mbeidh riaráistí ag do ghnó agus nach mbeidh tú ag plé le d’iasachtóir, tá an baol ann go measfaidh d’iasachtóir nach bhfuil do ghnó ag comhoibriú. D’fhéadfadh go mbeadh impleachtaí diúltacha fadtéarmacha aige seo do rátáil chreidmheasa do ghnó.

Cé go mbíonn dálaí éagsúla ag gach iasachtaí ar leith, d’fhéadfadh na himpleachtaí seo a leanas a bheith ann duit féin agus do do ghnó mura mbíonn tú ag plé le d’iasachtóir, ag brath ar théarmaí sonracha an chomhaontaithe creidmheasa atá agat le d’iasachtóir:

• Ní bheidh d’iasachtóir ábalta a chinneadh an féidir leis socrú malartach a thairiscint do do ghnó, rud a d’fhéadfadh cabhrú le do ghnó fanacht i mbun trádala le linn a chuid deacrachtaí reatha
• B’fhéidir go dtarraingeoidh d’iasachtóir siar na saoráidí creidmheasa atá á dtairiscint aige duit faoi láthair
• B’fhéidir go ngearrfaidh d’iasachtóir táillí breise, ús níos airde nó pionóis airgeadais eile ar do ghnó
• Má tá urrús curtha ar fáil agat mar thaca leis na saoráidí creidmheasa, féadfaidh d’iasachtóir a chearta dlíthiúla agus conarthacha a fheidhmiú chun an t-urrús sin a fhorfheidhmiú. I gcás ina réadófar urrús, leanfaidh an t-iasachtaí (ráthóirí san áireamh) de bheith faoi dhliteanas i leith aon fhiachais atá fós amuigh
• Féadfaidh d’iasachtóir a mheas nach bhfuil do ghnó ag comhoibriú leis. Má dhéantar tú a aicmiú mar iasachtaí nach bhfuil ag comhoibriú, is lú seans go dtairgfidh d’iasachtóir socrú malartach do do ghnó, agus is mó seans go bhforghníomhóidh sé a chearta maidir le hurrús
• Is í tuarascáil chreidmheasa do ghnó is mó atá i mbaol i gcás ina mbeidh riaráistí ag do ghnó, agus nach mbeidh do ghnó ag plé lena iasachtóir chun a chuid deacrachtaí airgeadais a réiteach.

Tá creat láidir um chosaint tomhaltóirí i bhfeidhm ag an mBanc Ceannais, lena gclúdaítear tomhaltóirí agus FBManna. Faoi chreat an Bhainc Ceannais, cosnaítear FBManna faoin gCód um Chosaint Tomhaltóirí agus faoi Rialacháin FBM. Tá sé tábhachtach go ndéanfaidh tú teagmháil le d’iasachtóir mar ní bheidh feidhm ag cuid mhór de na cosaintí sin ach amháin má bhíonn tú ag plé le d’iasachtóir.

Má tá imní ort go bhfuil deacracht airgeadais ag bagairt ar do ghnó, ba chóir duit labhairt le do bhanc nó le d’iasachtóir.

Cé gur faoi gach iasachtóir ar leith é cinneadh a dhéanamh maidir le hiarratas ar chreidmheas, agus nach bhfuil aon ról ag an mBanc Ceannais i gcinntí tráchtála na mbanc nó na n-iasachtóirí sin, tacaíonn an Banc Ceannais le soláthar creidmheasa chuig gnóthaí inmharthana.

Tá cinntí beartais áirithe glactha ag an mBanc Ceannais, mar chuid den Eurochóras, lena gcumasaítear d’iasachtóirí sreabhadh creidmheasa chuig an ngeilleagar a choimeád ar bun le linn tréimhsí struis airgeadais.

Má dhiúltaíonn iasachtóir d’iarratas ar chreidmheas ó iasachtaí, ní mór dó na cúiseanna atá leis an diúltú sin a mhíniú.

Mura mbeidh tú sásta le cinneadh an iasachtóra maidir le d’iarratas ar chreidmheas, féadfaidh go mbeidh an ceart agat achomharc a dhéanamh in aghaidh an chinnidh sin chuig an Oifig um Athbhreithniú Creidmheasa.  Ní mór don iasachtóir tú a chur ar an eolas maidir leis an gceart achomhairc sin agus ní mór dó sonraí teagmhála na hOifige um Athbhreithniú Creidmheasa a thabhairt duit.

I gcomhréir le Rialacháin FBM an Bhainc Ceannais, tá an Banc Ceannais ag súil leis go mbeidh iasachtóirí ag plé leat chun teacht ar réitigh oiriúnacha, agus go gcuirfidh siad a oiread iasachtaithe agus is féidir ar a mboinn arís maidir lena gcuid fiach a aisíoc.

B’fhéidir go dtairgfidh d’iasachtóir socrú malartach duit chun an t-ualach airgeadais ar do ghnó a mhaolú, nó b’fhéidir go dtairgfidh sé creidmheas nua do do ghnó chun cabhrú leis fanacht i mbun trádála sa tréimhse chrua seo.

Is ionann socrú malartach agus comhaontú nua le d’iasachtóir chun dul i ngleic le riaráistí nó deacrachtaí airgeadais, na cinn seo a leanas an áireamh:

• Íocaíocht laghdaithe, a d’fhéadfadh a bheith níos lú nó níos mó ná ús amháin, ar feadh tréimhse ar leith
• I gcás socrú “ús amháin”, ní íocfaidh tú ach na híocaíochtaí úis ar do d’iasacht go ceann tréimhse ar leith
• Méadú sealadach ar do shaoráidí caipitil oibre i gcás ina gcomhaontófar é sin le d’iasachtóir, mar shampla, chun dul i ngleic le saincheisteanna sealadacha leachtachta
• Sos ó íocaíochtaí, áit a ndéanfaidh tú comhaontú le d’iasachtóir chun do chuid aisíocaíochtaí iasachta a chur ar athlá nó a laghdú go ceann tréimhse shocraithe.

Bíonn imthosca éagsúla ag iasachtaithe, agus dá bhrí sin, breithneoidh d’iasachtóir do chás féin agus pléifidh sé raon roghanna éagsúla leat chun cabhrú leat dul i ngleic le do chuid deacrachtaí airgeadais.

Cé gur faoi gach iasachtóir ar leith é cinneadh a dhéanamh maidir le hiarratas ar chreidmheas, agus nach bhfuil aon ról ag an mBanc Ceannais i gcinntí tráchtála na mbanc nó na n-iasachtóirí sin, tacaíonn an Banc Ceannais le soláthar creidmheasa chuig gnóthaí inmharthana.

Mura dtairgfidh d’iasachtóir socrú malartach duit, ní mór dó na cúiseanna sonracha atá leis sin a chur in iúl duit i scríbhinn.

Ina theannta sin, ní mór do d’iasachtóir a chur in iúl duit go bhfuil an ceart agat achomharc a dhéanamh in aghaidh a chinnidh agus an próiseas chun déanamh amhlaidh a mhíniú duit. Ní mór do d’iasachtóir cinneadh a dhéanamh maidir le d’achomharc laistigh de 15 lá, nó mura féidir leis é sin a dhéanamh, ní mór dó a chur in iúl duit cathain a dhéanfaidh sé an cinneadh sin agus a mhíniú duit cén fáth a dtógfaidh sé tréimhse níos faide ná 15 lá.

Mura bhfuil tú sásta le cinneadh an bhainc nó an iasachtóra i ndáil le d’iarratas ar chreidmheas, féadfaidh go mbeidh an ceart agat achomharc a dhéanamh in aghaidh an chinnidh sin chuig an Oifig um Athbhreithniú Creidmheasa. Ní mór don iasachtóir tú a chur ar an eolas maidir leis an gceart sin agus sonraí teagmhála na hOifige um Athbhreithniú Creidmheasa a thabhairt duit.

Tá. Tar éis an t-athbhreithniú a chur i gcrích, ní mór do d’iasachtóir freagra a thabhairt ar d’iarratas laistigh de 15 lá lena chur in iúl duit an bhfuil sé i gceist aige socrú malartach a thairiscint duit; nó ní mór dó a chur in iúl duit cathain a thabharfaidh sé freagra ort agus a mhíniú duit cén fáth a dtógfaidh sé tréimhse níos mó ná 15 lá déanamh amhlaidh.

Tosaíonn an tréimhse 15 lá ón dáta a gheobhaidh d’iasachtóir an fhaisnéis a bheidh iarrtha aige chun a chumasú dó d’iarratas ar shocrú malartach a bhreithniú.

Beidh socruithe malartacha éagsúla ann idir iasachtóirí agus custaiméirí ar leith agus, dá bhrí sin, beidh impleachtaí airgeadais éagsúla ann do gach iasachtaí ar leith.

I gcás ina dtairgfidh iasachtóir socrú malartach, ní mór don iasachtóir an fhaisnéis seo a leanas a áireamh sna doiciméid tairisceana:

• An tréimhse ama a bheidh ag an iasachtaí chun glacadh leis an socrú malartach atá á thairiscint
• Na méideanna nua aisíocaíochta a bheidh i gceist ar an tsaoráid chreidmheasa faoin socrú malartach beartaithe, agus líon agus minicíocht na méideanna aisíocaíochta sin
• Téarma an tsocraithe mhalartaigh
• Na himpleachtaí a bhaineann le socrú malartach lena n-áirítear an tionchar a bheadh aige ar an méid seo a leanas:

• Tréimhse an chomhaontaithe saoráide creidmheasa
• An t-iarmhéid gan íoc ar an gcuntas agus
• Méid airgid aon riaráistí ar an gcuntas.

• Más eol, sonraí aon fhiachais iarmharaigh a bheidh fágtha ag deireadh socraithe mhalartaigh agus a bheidh dlite den iasachtaí agus, murab eol, sonraí faoin gcaoi ina gcinnfear an fiachas iarmharach.
• An chaoi ina ndéanfar ús agus muirir a chur i bhfeidhm ar an tsaoráid chreidmheasa de thoradh an tsocraithe mhalartaigh.

Tá seans ann go dtiocfaidh athrú ar chostas do chreidmheasa má ghlacann tú le socrú malartach. Is ionann an costas creidmheasa agus an difríocht idir an méid a fhaigheann tú ar iasacht agus an méid iomlán a aisíocann tú thar thréimhse na hiasachta. Bíonn tionchar ag rudaí éagsúla ar an gcostas creidmheasa amhail an t-ús a ghearrfar, táillí, minicíocht aisíocaíochtaí, tréimhse d’iasachta agus muirir eile. Míneofar aon athrú ar chostas do chreidmheasa duit má bhíonn tú ag plé le d’iasachtóir.

Má thagann athrú ar d’imthosca, lena n-áirítear má thagann feabhas orthu, tar éis duit socrú malartach a chomhaontú, ba cheart duit é sin a chur in iúl do d’iasachtóir a luaithe is féidir. B’fhéidir nach mbeidh an socrú atá agat oiriúnach duit a thuilleadh. Sa chás sin, déanfaidh d’iasachtóir athbhreithniú ar do chás agus breathnóidh sé ar na roghanna eile atá ar fáil.

Mura dtairgeann d’iasachtóir socrú malartach duit, ní mór a chur in iúl duit i scríbhinn cén fáth nach bhfuil socrú malartach á thairiscint aige agus go bhfuil an ceart agat achomharc a dhéanamh in aghaidh an chinnidh sin.

Ní mór do d’iasachtóir a mhíniú duit conas is féidir leat achomharc a dhéanamh agus ní mór dó cinneadh a ghlacadh maidir le d’achomharc laistigh de 15 lá. Mura féidir leis é sin a dhéanamh, ní mór dó a chur in iúl duit cathain a dhéanfaidh sé an cinneadh sin agus a mhíniú duit cén fáth a dtógfaidh sé tréimhse níos faide ná 15 lá.

Féadfaidh go mbeidh tú in ann achomharc a dhéanamh freisin chuig an Oifig um Athbhreithniú Creidmheasa in aghaidh chinneadh an iasachtóra. Ní mór do d’iasachtóir tú a chur ar an eolas maidir le do cheart chun achomharc a dhéanamh chuig an Oifig um Athbhreithniú Creidmheasa agus ní mór dó sonraí teagmhála na hoifige sin a thabhairt duit.

Ní mór don iasachtóir tréimhse réasúnach ama a thabhairt duit chun cinneadh a dhéanamh i dtaobh achomharc a chur isteach - beidh 20 lá oibre ar a laghad i gceist leis an tréimhse sin ón dáta a chuirfidh an t-iasachtóir in iúl duit go bhfuil cinneadh glactha aige gan socrú malartach a thairiscint duit.

Ní mór don iasachtóir leabhrán faisnéise a thabhairt duit ina míneofar próiseas achomhairc inmheánach an iasachtóra, mar aon leis na tréimhsí ama a bhíonn i gceist.

Má thagann athrú ar d’imthosca, lena n-áirítear má thagann feabhas orthu, tar éis duit socrú malartach a chomhaontú, ba cheart duit é sin a chur in iúl do d’iasachtóir a luaithe is féidir.

B’fhéidir nach mbeidh an socrú malartach atá agat oiriúnach duit a thuilleadh. Sa chás sin, déanfaidh d’iasachtóir athbhreithniú ar do chás agus breathnóidh sé ar aon roghanna eile atá ar fáil.

Tá seans ann go dtiocfaidh athrú ar chostas do chreidmheasa má ghlacann tú le socrú malartach nua. Is ionann an costas creidmheasa agus an difríocht idir an méid a fhaigheann tú ar iasacht agus an méid iomlán a aisíocann tú thar thréimhse na hiasachta. Bíonn tionchar ag rudaí éagsúla ar an gcostas creidmheasa amhail an t-ús a ghearrfar, táillí, minicíocht aisíocaíochtaí, téarma d’iasachta agus muirir eile.

Trí dhul i mbun plé le d’iasachtóir, míneofar aon athrú ar chostas do chreidmheasa duit.

Beidh cumas iasachtóra do chuid saoráidí creidmheasa a tharraingt siar, mar aon leis na himthosca inar féidir leis amhlaidh a dhéanamh, leagtha amach sa chomhaontú saoráide creidmheasa a shínigh tú le d’iasachtóir.

Ma dhéanann iasachtóir comhaontú saoráide creidmheasa a tharraingt siar nó a leasú, ní mór don iasachtóir na cúiseanna atá leis an gcinneadh sin a mhíniú duit go pras i scríbhinn.

Is féidir.  Mura bhfuil tú sásta le cinneadh an bhainc nó an iasachtóra i ndáil le d’iarratas ar chreidmheas, b’fhéidir go mbeidh an ceart agat achomharc a dhéanamh in aghaidh an chinnidh sin chuig an Oifig um Athbhreithniú Creidmheasa. Ní mór do d’iasachtóir tú a chur ar an eolas maidir leis an gceart achomhairc sin agus ní mór dó sonraí teagmhála na hoifige sin a thabhairt duit freisin.

Tá an Oifig um Athbhreithniú Creidmheasa ceaptha an sreabhadh creidmheasa chuig gnóthaí inmharthana Éireannacha a chinntiú.

Bunaíodh an oifig sin chun próiseas simplí éifeachtach um athbhreithniú creidmheasa agus achomharc a chur ar fáil d’úinéirí gnó ar dhiúltaigh bainc rannpháirteacha creidmheas a thabhairt dóibh.

Ar na bainc rannpháirteacha, áirítear; AIB, BOI, PTSB agus Ulster Bank.

Níl aon bhaint ag an mBanc Ceannais le cinntí aonair creidmheasa a dhéanann iasachtóirí. Is cinntí tráchtála iad seo do na hiasachtóirí ar leith, agus níl an sainordú nó an cumas ag an mBanc Ceannais iallach a chur ar iasachtóir iasacht nó socrú malartach a chur ar fáil d’iasachtaithe ar leith i gcás ar bith.

Ó tharla gur eintitis thráchtála iad iasachtóirí, cinnfidh gach iasachtóir a fhonn creidmheasa, a bheartais agus a nósanna imeachta féin maidir le hiarratais ar chreidmheas ó iasachtaithe a mheas, lena n-áirítear ó iasachtaithe a bhfuil anás airgeadais ag gabháil dóibh.

I Rialacháin FBM an Bhainc Ceannais, tá cosaintí éagsúla ann do chustaiméirí FBM a bhfuil riaráistí ag bagairt orthu nó a bhfuil riaráistí acu.  Leis na cosaintí sin, ceanglaítear ar iasachtóirí na cúiseanna sonracha le diúltú nó tarraingt siar creidmheasa a thabhairt d’iasachtaithe.

Ina theannta sin, tá oibleagáid ar d’iasachtóir athbhreithniú láithreach ar imthosca airgeadais do ghnó a thairiscint duit, d’fhonn cabhrú le do ghnó a dheacrachtaí airgeadais a réiteach.

Má bhíonn tú míshásta le cinneadh d’iasachtóra, is féidir leat achomharc a dhéanamh in aghaidh an chinnidh sin trí phróiseas inmheánach achomhairc d’iasachtóra. Ní mór do d’iasachtóir leabhrán faisnéise a thabhairt duit ina míneofar a phróiseas inmheánach achomhairc, mar aon leis na hamlínte lena mbaineann.

Ní mór do d’iasachtóir cinneadh a dhéanamh maidir le d’achomharc laistigh de 15 lá, nó mura féidir leis é sin a dhéanamh, ní mór dó a chur in iúl duit cathain a dhéanfaidh sé an cinneadh sin agus a mhíniú duit cén fáth a dtógfaidh sé níos mó ná 15 lá.

Féadfaidh go mbeidh tú in ann achomharc a dhéanamh freisin chuig an Oifig um Athbhreithniú Creidmheasa in aghaidh chinneadh an iasachtóra. Ní mór do d’iasachtóir tú a chur ar an eolas maidir le do cheart chun achomharc a dhéanamh chuig an Oifig um Athbhreithniú Creidmheasa agus ní mór dó sonraí teagmhála na hoifige sin a thabhairt duit.

Is córas é an Príomh-Chlár Creidmheasa chun sonraí pearsanta agus creidmheasa a bhailiú maidir le hiasachtaí €500 nó níos mó.

Tugann an Príomh-Chlár Creidmheasa faisnéis fhíorasach d’iasachtóirí agus d’iasachtaithe maidir le stair chreidmheasa iasachtaithe, lena n-áirítear sonraí maidir le féichiúnas iomlán iasachtaithe agus a stair íocaíochta, amhail íocaíochtaí a rinneadh agus íocaíochtaí a cailleadh.

Ní mór d’iasachtóirí faisnéis chruinn, iomlán atá cothrom le dáta a thuairisciú don Phríomh-Chlár Creidmheasa agus is é ról an Bhainc Ceannais an fhaisnéis sin a mheaitseáil chun tuarascáil chreidmheasa a chruthú.

Is féidir le hiasachtóirí agus le hiasachtaithe araon iarratas a dhéanamh ar thuarascálacha creidmheasa.

Baineann iasachtóirí leas as an bhfaisnéis sin chun tuiscint níos fearr a fháil ar staid iomlán airgeadais an iasachtaí, rud a chumasóidh dóibh measúnú a dhéanamh ar iarratas i dtéarmaí chumas an duine a chuid/a cuid iasachtaí reatha agus iasachtaí beartaithe a aisíoc.

Is chun leas na n-iasachtóirí agus na n-iasachtaithe araon a chuireann iasachtóirí creidmheas ar fáil ar mhodh freagrach nach gcuirfidh an t-iasachtóir nó an t-iasachtaí i mbaol míchuí.

Ní mór a chur san áireamh nach gcuireann an Príomh-Chlár Creidmheasa scóir chreidmheasa nó rátálacha creidmheasa ar fáil, agus nach dtugann sé treoir maidir leis an gcinneadh is cóir d’iasachtóir a dhéanamh i ndáil le hiarratas ar chreidmheas ó iasachtaí.

Is faoi gach iasachtóir atá sé cinneadh iasachta a dhéanamh i gcomhréir lena bheartas creidmheasa agus lena fhonn riosca féin, faoi réir an dlí is infheidhme agus na gceanglas rialála.

Tá go leor iasachtaithe buailte ag COVID-19. Níorbh aon mhilleán ar na daoine féin é go ndearnadh dochar do chumas a ngnóthaí a gcuid fiach a aisíoc de réir mar a tháinig laghdú ar ioncam agus de réir mar a cuireadh brú ar ghnóthaí dúnadh nó a gcuid samhlacha gnó a athrú de bharr orduithe chun fanacht sa bhaile.

Is iarmhairt normálta, nádúrtha ar COVID-19 é athstruchtúrú fiach, morgáiste san áireamh.

B’fhéidir go gcabhróidh athstruchtúrú fiachais le do ghnó a chuid oibleagáidí airgeadais a chomhlíonadh, lena n-áirítear aisíoc iomlán do chuid fiachais amach anseo.

Má dhéanann do ghnó athstruchtúrú a chomhaontú le d’iasachtóir de thoradh anás airgeadais, mar shampla téarma d’iasachta a fhadú chun go mbeidh do ghnó ábalta aisíocaíochtaí níos ísle a dhéanamh, déanfar é sin a thuairisciú don Phríomh-Chlár Creidmheasa agus áireofar i do thuarascáil chreidmheasa é.

Más mian le hiasachtaithe ráiteas míniúcháin a chur lena dtuarascáil chreidmheasa d’fhonn aon iontráil ar a dtaifead creidmheasa a mhíniú, is féidir leo déanamh amhlaidh tráth ar bith.

Ní mór a chur san áireamh nach gcuireann an Príomh-Chlár Creidmheasa scóir chreidmheasa nó rátálacha creidmheasa ar fáil, agus nach dtugann sé treoir maidir leis an gcinneadh is cóir d’iasachtóir a dhéanamh i ndáil le hiarratas ar chreidmheas ó iasachtaí.

Is faoi gach iasachtóir ar leith atá sé cinneadh iasachta a dhéanamh i gcomhréir lena bheartas creidmheasa agus lena fhonn riosca féin, faoi réir an dlí is infheidhme agus na gceanglas rialála.